Zuzendaria: Bertha Gaztelumendi

Urtea: 2019

Herrialdea: Euskal Herria

Iraupena: 66 min.

Generoa: Dokumentala

Ez, eskerrik asko! Gladysen leihoa 2019ko dokumental ezaguna da. Bertha Gaztelumendik zuzendua eta zendu berri den Sabino Ormazabalek idatzia, hiru urteko lan mardularen emaitza da.

Gladys del Estal Ferreño gazte ekologista donostiarraren historia du abiapuntu. 80ko hamarkada hasieran mugimendu antinuklearra puri-purian zegoen nazioartean, eta baita Euskal Herrian ere. Kostaldean eraikitzear ziren hiru zentralez gain (Lemoiz, Ea-Ispaster eta Deba), Arguedasen laugarren bat egiteko asmoa zegoen.

Horren aurka protestatzeko, mobilizazioak antolatu ziren Tuteran. Gladys del Estal Ferreño Tuterara joan zen, baina ez zen itzuli. Manifestazio baketsu hartan, Guardia Zibil baten tiroak hil zuen.

Ordea, dokumentala ez da Gladysen heriotzaren kontakizun hutsa. 1970eko eta 1980ko hamarkadetako mugimendu antinuklearra ere aztertzen du; izan ere, ez zen talde txiki baten protesta hutsa. Garai hartan gizarte-mugimendu zabala bihurtu zen, ekologismoa, bakezaletasuna eta zentral nuklearren aurkako borroka uztartuz. Euskal Herrian mobilizazio ugari egin ziren, eta protesta horiek herritar askoren babesa lortu zuten.

Hala, filmak mugimendu horren bilakaera erakusten du, garai hartako gatazka ekologikoa, protesta soziala eta indarkeriaren ondorioak berrikusiz. Hau da, memoria historikoa eta memoria soziala lantzea du xede.

2019ko azaroan, Bilboko ZINEBI jaialdian aurkeztu zen, eta hilabete beranduago Donostiako Giza Eskubideen Zinemaldiaren baitan izan zen ikusgai. Halaber, 2020ko Ikus-entzunezkoen Argia Saria eskuratu zuen.

Argia komunikabidearen multimedia atalean dago ikusgai