Zinemagile belgikarraren lan berriena Toronton estreinatu ostean iritsiko da Donostiara; lehiaz kanpo erakutsiko dute. Bigarren Mundu Gerran prentsa belgikarra nazien okupazioaren kontrako arma nola bihurtu zen kontatuko du.

Irekierako filma ezagutarazi ostean, Donostia Zinemaldiak 74. edizioari akabera emango dion lana zein izango den argitu du. Michaël R. Roskamek zuzendutako Le Faux Soir aukeratu dute kasurako, Bigarren Mundu Gerran belgikarren erresistentziarekin lotutako ekintza klandestino bat kontatuko duena. Filma irailaren 26an emango dute Kursaalean, epaimahaiak palmaresa jakinarazi ondoren.

Toronton mundu mailako estreinaldia izan berritan iritsiko da zinemagile belgikarraren lan berriena Donostiara. Sail Ofizialean erakutsiko dute, baina lehiaz kanpo. Marie Istasen Le “faux” Soir, 9 novembre 1943 liburuan oinarritua dago, eta hain zuzen ere, urte hartan girotuta dago, naziek Belgikako Le Soir egunkari nazionala propagandarako erreminta bihurtu zutenean. Biztanleriaren morala goratzeko, Erresistentziako kide batzuek ideia burugabe bat izan zuten: egunkariaren edizio faltsu bat sortzea okupatzaileei iseka eginez; zenbait historialariren ustez, komunikabide bat hackeatzen zen lehen aldia izan zen hura.

Arieh Worthalter, Mélanie Thierry, Karim Leklou, Mara Taquin, Bouli Lanners, Julien Frison eta François Damiens dira filmeko aktore protagonistak.

Kazetaritzan hezitakoa

De Morgen nederlanderazko egunkarian lan egin ostean bilakatu zen Michaël R. Roskam zinemagile. Carlo (2004) eta The One Thing to Do (2005) film laburrak idatzi eta zuzendu zituen lehenik, eta Rundskop / Bullhead (2011) izan zen bere lehen film luzea, Berlingo Panorama sailean estreinatu eta nazioarteko film onenaren Oscar sarirako izendatua izan zena.

2024an, Donostia Zinemaldian lehiatu zen aurrenekoz, The Drop filmarekin, eta Gidoi onenaren Epaimahaiaren Saria lortu zuen. Aurretik, Le Fidèle / Racer and the Jailbird (2017) lehiaz kanpo estreinatu zen Venezian, eta Belgika ordezteko hautatua izan zen Oscar sarietarako. 2021ean Black Bird telesailaren hiru atal zuzendu zituen.