Rusiye Federatsiyası tarafından işğal etilgen Aqyarda Armannıñ 12-nde aqşam ava telükesi ilân etildi, bundan soñ şeerde patlavlar eşitildi ve elektrik teminlevi yoq oldı, dep bildire yerli telegram kanalları ve Aqyarnıñ Rusiye akimiyeti.

"Krımskiy veter" telegram kanalı, Rusiye arbiyleriniñ mobil ateş gruppaları şeerniñ Gagarin rayonı üzerinde dronlarnı urıp tüşürmege tırışqanlarını bildirdi. Berilgen malümatqa köre, dronlar Balaklavskaya TES-ke doğru yol alğan. Daa soñra yerli pablikalerde sakinler elektrik stansiyasına "uruluv"nı muzakere etmege başladılar.

"Krımskiy vetr" telegram kanalınıñ malümatına köre, Rusiye ava mudafaasınıñ işi sebebinden Balaklavskaya yaqarlıq stansiyasınıñ yanında uçaq ya da raketanıñ parçaları arabağa tüşken, bu da içinde olğan insanlarnıñ ölümine ketirgen.

Aqyarnıñ Rusiye yolbaşçısı Mihail Razvojayev ava mudafaasınıñ çalışqanını ve energetika obyektine ücüm ola bilecegini bildirdi ve sakinlerni "telefonlarınıñ yüküni iqtisat etmege" çağırdı.

Bundan da ğayrı, 22:50 civarında Aqyar civarındaki Şturmovoye köyü yanında büyük suv teminatı obyektinde yanğın çıqtı.

Saat 01:54 Keriç köpründe bir buçuq saat devamında areket toqtatıldı.

Rusiye akimiyeti ve Rusiye Mudafaa nazirligi, gece ücümniñ aqibetleri ve infrastrukturanıñ zarar körgenini şimdilik tafsilâtlı şekilde izaatlamadı.

2022 senesinden başlap Qırım yarımadasınıñ territoriyasına aman-aman er kün pilotsız uçaq ve raketalar ücüm ete. Çoqusı allarda Rusiye Mudafaa nazirligi ya da Rusiye akimiyeti, bu malümatnı tasdıqlasa bile, arbiy obyektlerge zarar ketirilgenini tasdıqlamay.