Rusiye işğal etken Qırım yarımadasında avgustnıñ 12-ne keçer gecesi uçucısızlarnıñ kütleviy ücümi aqqında bildireler. Patlavlar, ava mudafaasınıñ işi ve atışlar aqqında Qırımnıñ çoqusı region sakinleri yaza, Aqyarnıñ işğalci akimiyeti haber ete.

Avgustnıñ 11-nde saat 20:16-da Aqyarda bütün gece aralıqlarnen devam etken ava telükesi ilân etildi. "Krımskiy veter" Telegram kanalı ve yerli sakinlerniñ malümatına köre, patlavlar, mobil ateş gruppaları ve "Pantsir"" zenit kompleksleriniñ işi Felenk burnu, Yalta qalqası, Balıqlava TESi, MGTES ve Aqyardaki altstantsiyada qayd etildi. Patlavlar "Kaça", "Belbek" ve Novofedorovkadaki "Saki" uçaq alanlarında oldı.

Bundan ğayrı, ava mudafaasınıñ işi, dron uçuşları ve patlav sesleri aqqında Keriç, Kefe, Yalta, Bağçasaray ve Aqmescit rayonları, Kezlev ve Qırımnıñ Cenübiy yalısında yaşağanlar bildirdi. Aqşam keç saatlarında Keriç köprü areketke vaqtınca qapatıldı. Aqyar, Bağçasaray rayonı, Kezlev ve Saq da olğan bir sıra mesken yerde ışıqlar söndürildi.

"Krımskiy veter" monitoring gruppası uydu çekimleriniñ malümatına esaslanıp haber etkenine köre, gece ücümindeyen soñ Balıqlava civarında eki büyük yanğın qayd etildi – Pervomayka köyü yanında ve "Vasili" plâjında rayonında.

Aqyarnıñ Rusiye yolbaşçısı Mihail Razvojayevniñ bildirgenine köre, "arbiyler, aviatsiya, ava mudafaası ve mobil Ateş gruppaları Ukrayina Silâlı quvetleriniñ kütleviy ücümini keri qaytara". Onıñ aytqanına köre, regionda "30-dan ziyade uçucısız tüşürildi". Razvojayev kimse yaralanmadı, amma Balıqlava ve Gagarin rayonında "çoq daireli ve mustaqil evlerniñ camları qırıldı, evlerden biriniñ damı yandı ve tüşken parçalardan ormanlar yandı", dep bildirdi.

Rusiye Mudafaa nazirligi avgustnıñ 11-nde kündüz ücüm aqqında esabat berip, bir qaç Rusiye regionı, Qırım yarımadası ve Azaq deñizinde 42 ukrayin uçucısızı yoq etildi, dep bildirdi. Rusiye müessiseyesi gece ücümini al-azırda izaatlamadı.

Ukrayina arbiyleri gece ücümi haberini şimdilik izaatlamadı.

Faal arbiy areketler vaqtında Qırım.Aqiqat Rusiye işğalci akimiyetiniñ malümatını tez tasdıqlap ya da teşkerip olamay.

2022 senesinden başlap Qırım yarımadasınıñ territoriyasına aman-aman er kün pilotsız uçaq ve raketalar ücüm ete. Çoqusı allarda Rusiye Mudafaa nazirligi ya da Rusiye akimiyeti, bu malümatnı tasdıqlasa bile, arbiy obyektlerge zarar ketirilgenini tasdıqlamay.