Kıyivde gece Rusiye ücüminiñ neticesinde bir insan yaralandı, dep bildire Fevqulâde vaziyetler devlet hızmeti.

Fevqulâde vaziyetler devlet hızmetiniñ malümatına köre, Şevçenko rayonında bala hastahanelerinden biriniñ territoriyasına uruluv qayd etildi, anda eki çuqur peyda oldı, binanıñ camı ve gaz borusı zararlandı. Gaz hızmetiniñ hadimleri gaz qaçuvını yoq ettiler.

Berilgen malümatqa köre, balalar ve ekimler sığınaqta ediler.

Diger adres boyunca anbarda yanğın — 1200 kvadrat metrlik yanğın söndürildi. Bu yerde yaralanğan adam tapıldı, dep qoşalar hızmette.

Polisnıñ malümatına köre, 28 yaşında bir adam yaralandı, onı hastahanege qoydılar.

Gece Kıyiv ballistika ücümime oğradı. Şeer başı Vitaliy Kliçko Şevçenko rayonına ekimlerniñ çağırılğanını bildirdi.

Rusiye arbiyleri Ukrayina regionlarına muntazam sürette ücüm ete, çeşit silâ qullana – uçucısız, raketa, KAB, reaktik toplu atış sistemaları.

Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tasnif ete ve olarnıñ maqsadı bar, dep qayd ete.

İnsanlarnı elektrik energiyası, sıcaq, su, bağ, tibbiy yardım ve yaşayış içün diger kerekli şaraitlersiz qaldırmaq içün eali yaşayışını teminlev sistemaları ve sağlıq müessiselerine qarşı ateşler genotsid areketleriniñ alâmetlerini taşıy.

Rusiye reberligi Rusiye ordusı büyük cenk vaqtında Ukrayinanıñ şeer ve köylerinde vatandaş infrastrukturasına qarşı darbe endirgenini, vatandaşlarnı öldürgenini ve hastahane, mektep, bala bağçaları, energetika ve suv obyektlerini yıqqanını inkâr ete.