TTAK gazte taldeak, Ekin Emakumeak Elkarteak, Arrasateko Udal Ludoteka eta Gaztetxokoak eta Txatxilipurdi Elkarteak osatzen duten Arrasateko Gaba Baltza batzordeak beste behin Arimen Gauaren euskal ohitura zaharren inguruan hainbat ekintza antolatu ditu «arrasatearrontzat elkarrekin gozatzeko».

Arrasateko udal ludotekek erabiltzaileentzako ekintza berezi ugari antolatu dituzte urriaren 22ra bitarte, tartean, fieltrozko panpinak sortzea, kandelagintza, ipuin kontaketa eta udazkeneko produktuekin sukaldaritza.

Arrasateko udal Gaztetxokoak ere, urtero legez, 12 urtetik gorako nerabeentzako Beldur Etxea antolatu dute urriaren 31 eta azaroaren 1erako. Tren geltoki zaharreko Gaztelekuan izango da eta gonbidapenak urriaren 29ra arte auzoetako gaztetxokoetan zein Tren Geltoki Zaharreko gaztetxokoan eskuratu ahal izango dira (plaza mugatuak izango dira).

Urriaren 22an, Ekin Elkartearen eskutik, 15 urtetik gorako herritarrentzako 'Sortu zure Kukumarroa' tailerra egingo da. Parte hartzeko, izen ematea urriaren 21era arte egongo da zabalik, horretarako galdetegia bete beharko da on line https://labur.eus/sortu_kukumarroa helbidean Gainera, ekintza honetan parte hartzeko, gonbita luzatzen die herritarrei etxean dituzten izara, gortina edota mahai-zapiak eraman ditzaten gaur asteartean, urriaren 20an, 08:00etatik 14:00etara eta 16:00etatik 20:00etara bitartean.

Bestalde, urriaren 30a egun berezia izango da. Aurten ere Arimen Biltzarra ospatuko dute.

Arratsaldeko 18:30etan Biteri arimen elkargune izango da. Bertatik irtengo da Monterroneraino luzatuko den kalejira. Behin Monterronera iritsita, hainbat sorpresa egongo dira. Bertan, herriko hainbat eragilek hartuko dute parte; Doke antzerki eskolak, Arrasateko txistulariak, Goikobaluko Izartxo taldeak, Arrasateko trikitixa eskolak, Txikitxu Arrostaitz dantza taldeak eta Ttakun txalaparta taldeak.

Herritarrei Arimen Biltzarrera Kukumarroz edota baserritarrez jantzita etortzeko dei egiten diete, «guztion artean herria alaitu eta jai giroan gozatzeko». Gaba Baltza batzordea osatzen duten eragileek, herritarrei egitarauan parte hartzeko gonbita luzatu nahi diete.

Gaur egun Halloween deritzan ospakizun atzerritarrak indarra hartu badu ere, bada Euskal Herrian zaharragoa den antzeko ohiturarik. Gaba Baltza edo Arimen Gauan gure arbasoek hildakoen arimak gogoratu eta adoratzen zituzten. Jatorriz paganoa zen ohitura hori udaren amaiera eta neguko hotzaren hasierarekin lotuta zegoen. Garai hau urriaren 31a eta azaroaren 1a bitarteko gau horren baitan gertatzen zen, herritarrek, beraien baratzeko kalabaza edota erbiak batu, itxuraldatu eta kale bazterretan edota etxeko leihotan kandela batekin ezartzen zutenean. Kandelen argi xume horietan, inguruko arimak islatzen zirela ere esaten zen.