Ил Дархан  Айсен Николаев   биллэрбит Култуура сылыгар,  сэтинньи 4 күнүттэн 9 күнүгэр диэри, Дьокуускайдааҕы  IX  норуоттар икки ардыларынааҕы  киинэ бэстибээлэ  ыытыллыаҕа.

«Уһук Илин уонна Арктика куораттарын  маастар-былааннарын иитинэн креативнай, айар индустриялар, ол иһигэр мультипликация, кинематография, ювелирнай дьыала, төрүт уус-уран дьарыктар сайдан эрэллэр. Ураты тыыннаах олохтоох  бородууксуйа оҥоһуллар буолла. Ол курдук, Дьокуускайга «Үлэ кыбаартала» креативнай кластер үлэлиир. Маннык эбийиэктэр Улан-Удэҕэ, Благовещенскайга, Владивостокка тутуллаллар», — диэн XI Илиҥҥи экэнэмиичэскэй форумҥа Владимир Путин бэлиэтээн эппитэ.

Айсен Николаев Саха Өрөспүүбүлүкэтин Судаарыстыбаннай Мунньаҕар (Ил Түмэҥҥэ) Анал этиитигэр, 2025 сылга  саха киинэтин  хомуура  рекорду олохтообутун  тоһоҕолоон бэлиэтээн турар.

«Биһиги киинэ режиссердарбыт уонна кинилэр хамаандаларын чаҕылхай киинэлэрэ номнуо  280 мөлүйүөн солкуобайы хомуйдулар. Бу ааспыт сыл 150 мөлүйүөн солкуобайдаах көрдөрүүтүттэн икки төгүл кэриҥэ элбэх. «Кончится лето», «Диодорова», «Айхал» уонна «Спид Стар» киинэлэр  лиидэринэн буоллулар. «Саха» НКИХ ойуулуга  уонна сэрийээлэ  Арассыыйатааҕы уонна Уһук Илиннээҕи киинэ бириэмийэлэрин хаһаайыннара буоллулар. Кэлэр сылга федеральнай үбүлээһин суотугар Дьокуускай куоракка толору цикллаах киинэ павильонун бырайыактыыр-симиэтэлиир докумуона бэлэмнэниэҕэ», — диэтэ Саха сирин баһылыга.

Киинэ бэстибээлин  устуоруйатыгар аан бастаан тэрээһин кыһыҥҥы кэмҥэ ыытыллыаҕа. Онон сүрүн наҕарааданы — «Кыһыл көмүс хаар ачыкыны» — Саха сирин дьиҥнээх кыһыныгар   туттарыахтара.

«Бэстибээл аан бастаан кыһын  Дьокуускайга ыытыллыаҕа. Биһиги аан дойдутааҕы ыалдьыттарбыт өрөспүүбүлүкэбит кэрэтин, тыйыс усулуобуйаҕа олорор дьону уонна киинэни айар  уратыты дьоммутун,  айылҕабыт кэрэтин көрүөхтэрэ», — диэн бэстибээли  тэрийээччи, «Сахафильм» киинэ хампаанньатын салайааччыта Алексей Егоров бэлиэтээтэ.

Сиһилии: https://www.sakha.gov.ru/news/67144