Андрей Колобов устуоруйата – бу тулуурдаах буолуу, көлүөнэлэр утумнаһыыларын уонна таһаарыылаах үлэҕэ төннүү туһунан кэпсээн. Георгиевскай кириэс IV истиэпэнинэн уонна байыаннай дьайыы кыттыылааҕын мэтээлинэн наҕараадаламмыт байыаннай  дьайыы бэтэрээнэ бүгүн биир дойдулаахтарыгар дьиэлэрин-уоттарын оҥорорго көмөлөһөр, оттон бэйэтэ эйэлээх олоххо тирэҕи булар.

Андрей Саха сирин кыһыл көмүһү хостуур салаатыгар 1996 сыллаахха үлэтин саҕалаабыта. Кини уолугар ыарахан үлэҕэ холобур буолбут аҕатын суолунан барбыта. Андрей 15 тахса сыл бульдозериһынан үлэлээбитэ, гусеницалаах тиэхиньикэ бары мааркатын баһылаан. Тэҥинэн кини В уонна С категориялаах суоппар идэтин баһылаабыта – бу дьоҕура инники кирбиигэ элбэхтик туһалаабыта.

2022 сыл балаҕан ыйын 22 күнүгэр Андрей мобилизацияланан, мотострелковай батальон штурмалыыр ротатыгар ыытыллыбыта. Байыаннай сулууспа түөрт сылыгар бойобуой усулуобуйаҕа кини ытык иэһин толорбута, хорсунун уонна тулуурун көрдөрөн.

2026 сылга доруобуйатын туругунан Андрей Колобов саппааска тахсыбыта. Эйэлээх олоххо төннүүтүгэр дьоһун оруолу социальнай өйөбүл тиһигэ оҥорбута. “Защитники Отечества” судаарыстыбаннай пуонда сүрүннээччилэрин көмөлөрүнэн бэтэрээн бэйэ дьыалатын арыйарга быһаарыммыта. Кини кыбартыыра өрөмүөнүгэр бырайыагын ситиһиилээхтик көмүскээбитэ уонна Саха сирин Үлэҕэ уонна социальнай сайдыыга министиэристибэтин нөҥүө судаарыстыба өйөбүлүн ылбыта.

Бүгүн Андрей Колобов дьиэлэри уонна кыбартыыралары өрөмүөннүүр, дьоҥҥо нус-хас олоҕу бэлэхтиир. Киниэхэ бу көннөрү биисинэс буолбатах, уопсастыбаҕа төннөр кыах.

Иллэҥ кэмигэр бэтэрээн дьиэ кэргэнин кытта айылҕаҕа сынньанар. Андрей киниэхэ олоҕун уустук кэмигэр көмөлөспүт күн күбэй ийэтигэр махтанар.

Андрей Колобов патриотизм уонна Аҕа дойдуга таптал үлэҕэ ытыктабылтан, өбүгэлэрин туһунан өйдөбүнньүктэн саҕаланарын билэр. Кини эһээтэ, Аҕа дойду Улуу сэриитин кыттыылааҕа Терехов Андрей Николаевич дьиэ кэргэҥҥэ сиэр-майгы үрдүк кэрэһитинэн буолар. Андрей бу сыаннастары уолугар иҥэриэн баҕарар.

Байыаннай дьайыы кыттыылаахтарын адаптацията уонна социализацията – судаарыстыбаҕа тумус тутуллар сорук. Дойду Бэрэсидьиэнэ Владимир Путин судаарыстыба тутаах соругун туруорбута: байыаннай дьайыы кыттыылаахтарыгар эйэлээх олоххо үлэ уонна идэни сайыннарыы көмөтүнэн төннөргө.