Zinemagile donostiarrak haurtzaroari eta despopulazioari buruzko istorio bat kontatuko du bere lehen film luzean. Aitarekin batera idatzi du, eta sei urtean filmatu dute, Palentzian.

Marina Palacio zuzendaria Y así seguirán las cosas bere lehen film luzea errodatzen ari da. Haurtzaroa eta herrietako despopulazioa izango dira istorio horren ardatza, eta German du protagonista, baita Estherrek, Franciscok, Angelek, Cesarrek, Guillermok eta Amirak osaturiko haur taldea ere. Fikzioaren eta errealitatearen artean hara-hona dabilen proiektua sei udatan filmatu dute (aurtengoa izango da azkena), Tierra de Camposen, Palentzian, aktore ez profesionalekin, eta “haurtzaroa, galera eta nostalgia” izango ditu hizpide.

Gariza Filmsek ekoitzi eta Elastica Filmsek banatuko duen filmak EITBren parte-hartzea du. Proiektuaren arduradunen hitzetan, “sotiltasuna, txikitasuna eta erraztasuna aldarrikatzen ditu. Gutxirekin asko kontatzen saiatuko gara. Eta zinema eta bizitza uztartzen”.