Սահմանադրության երեք հոդվածներով պետությունը երաշխավորում է խղճի և կրոնի ազատությունը, ինչպես նաև կրոնական կազմակերպությունների ինքնավարությունը։ Այս մասին Ազգային ժողովի նիստում՝ մարդու իրավունքների պաշտպանության և հանրային հարցերի մշտական խորհրդարանական հանձնաժողովի նախագահի ընտրության հարցի քննարկման ժամանակ, օգոստոսի 18-ին հայտարարեց այդ պաշտոնի թեկնածու, «Հայաստան» խմբակցության պատգամավոր Լիլիթ Գալստյանը՝ խոսելով երկրում քաղաքական բանտարկյալների առկայության և մամուլի ազատության պաշտպանության հետ կապված մի շարք խնդիրների մասին։

Նա նաև մտահոգություն հայտնեց Հայ առաքելական եկեղեցու շուրջ տեղի ունեցող իրադարձությունների կապակցությամբ։ Պատգամավորի խոսքով՝ Մարդու իրավունքների եվրոպական դատարանի որոշմամբ արձանագրվել է, որ պետական դատարանները իրավասու չեն քննելու եկեղեցու ներքին կառուցվածքին վերաբերող և կանոնական իրավունքով կարգավորվող հարցերը, քանի որ նման միջամտությունը խախտում է ոչ միայն կրոնական կազմակերպության ինքնավարությունը, այլև բոլոր քաղաքացիների խղճի և կրոնի ազատության իրավունքը։

«Քաղաքական մեծամասնությունն ընտրել է հանցավոր և ակնհայտ հակասահմանադրական ուղի՝ հայտարարելով իր մտադրության մասին ստիպել Նորին Սրբություն Կաթողիկոսին հրաժարական տալ և փոխել ազգային ինքնավար եկեղեցու կառավարման կարգը։ Երբ իշխանությունը որոշում է, թե ով պետք է ղեկավարի եկեղեցին՝ ընդ որում՝ ցանկացած գնով, դա արդեն խոսում է ամեն ինչի մասին, բայց ոչ իրավական պետության», - ասաց Գալստյանը՝ պատասխանելով իշխող «Քաղաքացիական պայմանագիր» կուսակցության պատգամավոր Մարիա Կարապետյանի հարցերին։