Sputnik Аҧсны

media@sputniknews.com

+74956456601

MIA „Rossiya Segodnya“

Sputnik Аҧсны

media@sputniknews.com

+74956456601

MIA „Rossiya Segodnya“

Sputnik Аҧсны

media@sputniknews.com

+74956456601

MIA „Rossiya Segodnya“

1920

1080

true

1920

1440

true

1920

1920

true

Sputnik Аҧсны

media@sputniknews.com

+74956456601

MIA „Rossiya Segodnya“

Sputnik Аҧсны

аԥсны, аналитикеи аиҿцәажәарақәеи, аибашьра аҭоурыхқәа: аиааира 30 шықәса

08:39 27.09.2026 (ирҿыцуп: 10:34 27.09.2026)

Анапаҵаҩра

Аԥсны Аџьынџьтәылатәи аибашьраан иҭахаз аҵеицәа ирыдҳәалоу ахҭысқәа, егьа аамҭа царгьы ргәакьацәа ихьааны ргәы иҭаҵәахзаауеит. Иахьа зыӡбахә шәзеиҭасҳәо Гагратәи аибашьҩы Анатоли Владимир-иԥа Коркьиа иԥсҭазаара анҿахҵәоз, иԥацәа хәыҷқәан. 13 шықәса зхыҵуаз Руслан, иахьа иуаҩыбжара дҭагылоуп, иара иажәақәа рыла ауп ишанҵоугьы иаб изку ихәыҷратә гәалашәарақәа.

Саида Жьиԥҳа, Sputnik

Анатоли Владимир-иԥа Коркьиа, шьаҿа ӷәӷәала аԥсҭазааратә мҩа ианыз иакәын. Акыр шықәса аус иуан аекскурсиатә фирмаҟны машьынаныҟәцаҩс. Иара шьҭрала Лӡаатәиин, Асычқәа ҳәа иахьашьҭаз ацуҭа датәын. Анатоли иаб игәараҭа аҩнду иргылеит, гәҭакысгьы иман иуаҩыбжарахь даннеилак арахь нахара даарц. Аха дахьымӡеит… иалагеит Аԥсны Аџьынџьтәылатәи аибашьра.

"Ашкол ҭалара аамҭа ааигәахон аҟнытә, ҳан Валентина Карамзиаԥҳа, сашьеиҳабы Валереи сареи ҳлыманы нанҳәа 14 аҽны Шәачаҟа дцеит, амаҭәеи ашколтә маҭәахәқәеи ҳзаалхәарц. Ҳгьежьны ҳшаауаз, ҳаб, Гагра ақалақь ҳаналала, автобус даԥыланы, иаразнак Асычқәаҟа ҳаигеит. Иара Пицундатәи агәыԥ аибашьцәа дрыцны аԥсадгьыл ахьчара дазгылеит", — еиҭеиҳәоит Анатоли иԥа Руслан.

Анатоли Коркьиа иеибашьратә мҩа алагеит Гагрантәи. Ныгәзар Долбаиа идҵаҟаҵарала далахәын Гагратәи ажәыларатә аоперациа. Анаҩс дахәҭакхеит Џьумка Чыргба ибаталион.

"Аибашьра аҽарӷәӷәо ианалага, ҳаб Пицундантәи, Урыстәылаҟа арратә ӷбала Шәачаҟа ҳдәықәиҵеит, устәи Киевҟа ҳцеит. Аԥсныҟа ҳааит Гагра араион ахы ианақәиҭха ашьҭахь. Исгәалашәоит ҳаб данаҳԥылоз, шаҟа зҵаара иаҳҭоз. Ақалақь ҳаналсуаз, ана-ара аибашьра ашьҭақәа ҳбон. Ҳхәыҷратә хшыҩ аҟны аагара уадаҩын иҟацәҟьаз аҵабырг", — игәалашәоит Руслан.

Ԥхынгәытәи ажәылараан, Анатоли Шромаҟа ицамҭазы, цәалашәара хьанҭак имазшәа иԥеиҵбы Руслан ивара дышьҭаиҵеит. Даарагьы даргәамҵуан аиҳабы Валера ианшьцәа рҿы Жәандәрыԥшь дахьыҟаз. Иҭахын рҩыџьегьы рлакҭа аҭаԥшра. Ашьыжь, Анатоли, Руслан даагәыдикылан, ауада дындәылҵеит илахь еиқәны. Аҽны, Анатоли иабхәында Варлам Карамзиа ила, иԥеиҳабы Валера изы иааишьҭит атапанча. Уи алагьы "абзиараз" ҳәа иаиҳәазшәа…

Анатоли иҩыза бзиа Хьымца Бениагьы атапанча ҳамҭас ииҭахьан. Аха Хьымца апатронаҭра ицәыӡит. Анаҩс уи шыԥшаахаз џьоушьаратәы иҟоуп.

"Ԥхыӡла, саб атапанча апатронақәа сџьыба иҭоуп, арахь иҭыга ҳәа саиҳәеит. Ашьыжь санҿыха, ихахьтәи маҭәа аџьыба сҭалазар, уаҟа иҭоуп апатронақәа. Сани сареи уамашәа ибаны, иншьан ахьеиныз иқәаҳҵеит. Ахәылбыҽха ҳгәы ҳҽанӡамкәа, Хьымца дааит аишәа дадтәалоит ҳәа. Ахҭыс анизеиҭаҳҳәа, даршанхеит. Убасҟан, иаргьы саб ҳамҭас ииҭахьаз атапанча апатронаҭра шицәыӡыз, аха атапанча ахаҭа иҵәахны ишимаз иҳәеит. Ажәакала атапанча амаҭәахәи иареи еибаԥшааит", — иихамшҭуа ахҭыс дазааҭгылеит Руслан Коркьиа.

Аԥсны Аџьынџьтәылатә еибашьра иалахәын Анатоли иашьцәа гәакьацәа Виталии Владимири. Анатоли дҭахоит Шроматәи (Гәыма) ажәылараан, ԥхынгәы 18 рзы, аибашьцәа рхыҵакырҭа иақәшәаз арҭҟәацга ахыԥҽыха иахырҟьаны. Ҩыџьа аԥацәа раб, 44 шықәса зхыҵуаз Гагратәи аибашьҩы Анатоли Владимир-иԥа Коркьиа данҭаха ашьҭахь ианашьан "Агәымшәаразы" амедал.

Анатоли Коркьиа иқәшәаз ахыԥҽыха иахырҟьаны убасҟак ихы-иҿы еилаԥыхха иҟан, дузымдырратәы. Ихәыҷқәагьы "ари ҳаб иакәымзар ҟалоит" ҳәагьы гәыӷрак рызцәырҵит, аха ргәы иажьон…

"Саб данҭаха ашьҭахь мызқәак ааҵуаны, уи аамҭазы аибашьра еилгахьан, иашьцәеи иҩызцәеи Шромаҟа ҳаргеит сашьеи сареи. Усҟан аԥсуа телехәаԥшра акорреспондент дсыҿцәажәарц лҽазылшәеит, аха сара сгәы ԥшаан, аҵәыуара салагеит. Уи нас акраамҭа ихьымӡхысшьон, схы сазгәамҵуан саб изы ажәак аҳәара ахьсылымшаз", – игәалашәоит сажәабжьҳәаҩ.

Руслан Коркьиа уаҳа Шромаҟа дымцеит, уа аҟазаара ицәауадаҩын азы. Сынтәа, ԥхынгәытәи ажәылараан Гәыма иҭахаз Пицундатәи абаталион аибашьцәа ргәалашәаразы абаҟа анаатыртуаз ауп, 33 шықәса рышьҭахь раԥхьаӡакәны данца. Иаб ихьӡ зныз абаҟа дадгыланы ифотосахьа аҭыхрагьы игәаӷьит.

Аб иоуп аҷкәын ахаҵара адунеи далазырԥшуа. Ан егьа лыԥсҭазаара изылкыргьы, иара дигзаауеит игәашьамх зырӷәӷәо ауаҩы.

Руслан Коркьиа иаб акырӡа диеиԥшуп. Дыззымдыруагьы "абри Анатоли иԥа иакәзар ҟалап" рҳәоит. Руслан арҭ ажәақәа иаб агәымшәа игәалашәара аҿаԥхьа еиҳагьы аҭакԥхықәра идырҵоит. Иашьеи иареи еихаҳаны иааргоит Анатоли ирзынижьыз ахԥша.

Анатоли Коркьиа ҩыџьа иԥацәа рҟнытә ирызҳаит хҩык амаҭацәа, еиҵагылеит ашьмаҭацәагьы.