08/10/2026 a las 15:49h.

Anaitasunako emakumezkoen taldeak Lakua Arriaga A taldearen aurka jokatuko du larunbat honetan, hilak 10, 15:30etatik aurrera etxean, San Juan futbol zelaian. Talde azkoitiarra sailkapen orokorreko bosgarren postuan dago 4 punturekin eta bere aurkaria hamargarrena da 3 punturekin.

Joan den astean, Bilboko San Ignacio zelaian, Euskal Ligako hirugarren jardunaldiko partidan 2-1 galdu ostean iritsiko da taldea neurketara.

Hirugarren jardunaldiko partidaren hasieran, baloiaren kontrola Anaitasunaren esku egon zen. Bilbao Artizarrak B taldeak bloke ertain-baxua osatu zuen, eta Anaitasunak baloia azkar mugitzen saiatu bazen ere, ez zuen aukera garbirik sortzea lortu. Etxekoek ere ez zuten arrisku handirik sortu eta, ondorioz, lehen zatia 0-0ekoarekin amaitu zen.

Atsedenaldiaren ostean, lehen zatiko gidoi berarekin jarraitu zuen partidak: Anaitasuna baloiarekin eroso eta Artizarrak hutsegiteren baten zain, gola lortzeko. 65. minutuan, hain zuzen ere, etxekoek bilatutako aukera iritsi zen. Anaitasunaren akats baten ondoren, Artizarraken aurrelari bat Intzan atezainaren aurrean bakarrik geratu zen eta ez zuen barkatu, etxekoen 1-0ekoa lortuz.

Golaren ondoren, aldaketak baliatuz, Anaitasunak bere jokoa aldatu eta erasoan jokalari gehiago pilatzen hasi zen. Horri esker, aukera gehiago sortu eta aurkariaren areara gero eta gehiago iritsi zen. Ahalegin horrek saria izan zuen 82. minutuan, Amaia-ren golari esker berdinketa lortu zuenean.

Azken hamar minutuetan, Anaitasunak beste golaren bila egin zuen aurrera, aurreko astean bezala garaipenaren bila azken unera arte. Baina, oraingoan, Artizarrak izan zen azken kolpea eman zuena. 92. minutuan, hegaletik egindako pase baten ondoren, etxekoen aurrelari bat Intzan atezainaren aurrean bakarrik geratu zen eta ez zuen barkatu. Horrela, 2-1ekoa jarri zuen markagailuan. Kolpe gogorra izan zen Anaitasunarentzat, batez ere kontuan hartuta Bilbao Artizarrakek apenas apenas gerturatu zela ate ingurura.

Gizonezkoek, igandean

Bestalde, Ohorezko Erregional mailako gizonezkoen taldeak asteazken honetan jokatu zuen atzeratutako hirugarren jardunaldiko partida, eta 2-1eko garaipena lortu zuen. Errazuk eta Amusek sartu zituzten Anaitasunaren bi golak.

Hiru jardunaldi bakarrik jokatuta, taldea sailkapeneko zortzigarren postuan dago sei punturekin. Igande honetan, hilaren 11n, jokatuko du hurrengo partida. 17:00etan izango da hitzordua Txerloian, Elgoibarren aurka, laugarren jardunaldiari dagokion neurketan.