08/10/2026 a las 15:50h.

Urriaren 16tik 25era egingo den Euskadiko Klima eta Energiaren Astearekin bat eginez, naturaren, biodibertsitatearen eta klima-aldaketaren inguruko hainbat ekintza izango dira Azkoitian.

Egitaraua urriaren 16an, ostirala, hasiko da, HH5-LH3 adin tarteko haurrentzako Mirua sorginak eskainiko duen 'Nik maite dut natura' ipuin-kontaketarekin. Jarduera 18:00etan izango da, Aizkibel liburutegian, eta txikienei naturarekiko interesa eta errespetua sustatzeko aukera eskainiko die. Izen-ematea zabalik dago liburutegian.

Hurrengo egunean, urriaren 17an, larunbata, Floreaga eta Jausoroko babesleku klimatikoetan zehar ibilaldi gidatua egingo da. Laia Koop. eta Izadi 21eko kideek osatutako lantaldearen eskutik, herriko bi eremu horiek ezagutzeko eta babesleku klimatikoek herritarren ongizatean eta klima-aldaketara egokitzeko prozesuan duten garrantziaz jabetzeko aukera izango da. Ibilaldia 11:00etan abiatuko da Floreagako bolatokitik, eta gehienez bi orduko iraupena izango du.

Egitarauak jarraipena izango du urriaren 22an, osteguna, Urola ibaiko landare inbaditzaileen inbentarioa eta ekintza-plana aurkeztuta. Aranzadi Zientzia Elkartearen eskutik, Urola ibaian identifikatutako landare inbaditzaileen inguruan egindako lana eta horiei aurre egiteko proposatutako ekintza-plana ezagutzera emango dira. Aurkezpena 18:00etan izango da, Elkarguneko Oteiza aretoan.

Azkenik, urriaren 23an, ostirala, Urola errekaren azterketa egingo da, Laia Koop. eta Izadi 21eko kideek osatutako lantaldearen eskutik. Jarduera 17:30ean izango da, Jausoroko berdegunean, eta herriko ur-ekosistemaren ingurumen-egoera bertatik bertara ezagutzeko aukera eskainiko du. Horretarako, errekako bizidun txikienen, hau da, makro-ornogabeen, laginketa bidezko azterketa egingo da.

Udalaren gonbidapena

Udalak herritarrak jardueretan parte hartzera animatu nahi ditu. Asteklima 2026ren baitan antolatutako egitarauaren helburua da klima-aldaketaren inguruko kontzientziazioa sustatzea eta ingurumenaren zaintzan herritarren inplikazioa indartzea, tokiko naturguneak eta udalerriko ekosistemak ezagutuz eta balioan jarriz.