Mugikortasunaren Europako Astea ospatuko da irailaren 22ra bitartean eta egitasmoarekin bat eginez, Azpeitiko Udalak hainbat ekintza antolatu ditu herritarren artean mugikortasun jasangarria sustatzeko.

Alde batetik, metrominutu panelak jarri ditu udalak herriko lau puntutan: Garmendiko kirol gunean, igerilekuaren aurrean, Betharrameko erakusketa aretoaren ondoan (Jose Artetxe kalea) eta Udaltzaingoaren eraikinaren ondoan (Plaza Txikia).

Metrominutua herri edo hiri bateko oinezko mugikortasuna sustatzeko mapa da, eta herriko puntu nagusien arteko oinezko ibilbideen distantziak eta gutxi gorabeherako denborak jasotzen ditu. Ekimenaren helburua herritarrak oinez egitera animatzea eta herri barruko joan-etorrietan autoaren erabilera murriztea da. «Askotan, autoa hartzen dugu ohituragatik, baina herri barruko joan-etorri asko oinez egiteko modukoak dira. Panel hauekin herritarrei informazio praktikoa eman nahi diegu, eguneroko mugikortasunean aukera jasangarriagoak hartzea errazteko», azaldu dute Joanes Amenabar eta Mikel Odriozola Ingurumeneko zinegotziek.

Bestalde, irailaren 20an, igandean, 17:30etik 19:30era, bizikletaren erabilera segurua sustatzeko bi jarduera egingo dira. Batetik, bizikletentzako trebetasun ginkana izango da Bustintzuriko Errebalean, 6 eta 14 urte bitarteko haurrei zuzenduta. Parte hartzaileek bizikletarekin duten trebetasuna eta segurtasuna lantzeko aukera izango dute.

Bestetik, bizikletentzako oinarrizko mekanika tailerra egingo da Olazko Amaren plazan. Herritar guztiei zuzendutako saioa izango da, eta eguneroko erabileran bizikletek izan ohi dituzten arazo ohikoenak konpontzeko oinarrizko ezagutzak eskainiko ditu. Bi jarduerak Arauntza Riders kirol taldeak bideratuko ditu.

Gipuzkoako Foru Aldundiak ere bat egingo du aurten Mugikortasunaren Europako Astearekin. Mugikortasuneko, Turismoko eta Lurralde Antolaketako departamentuak herriz herriko, hainbat ekintza antolatu ditu mugikortasun jasangarria sustatzeko. Gaur, osteguna, Azpeitira ere iritsiko dira eta 10:30etik 14:00etara bitartean plazan izango dira.

Batetik, 'Jarri prest zure bizikleta Mugirekin' tailerra eskainiko dute, aurreko urteetan ere egin izan duten ekimena berreskuratuz.

Bestetik, aurtengo berrikuntza gisa, gazteen artean mugikortasun jasangarria sustatzeko escape room joko bat antolatu dute.