Gasteizko hustubideak eta hiriko drainatze sistemak garbitzeko 3,4 milioi bideratuko ditu AMVISAk hiru urtean, Gasteizeko Udalak gaur ezagutzera eman duenez. Sacyr enpresari esleitu dizkiote garbiketa eta mantentze lanak egiteko kontratua. Udalak azaldu duenez, enpresak konpromisoa du "24 orduko guardia zerbitzua" bermatzeko. 

Kontratu honekin, udalak bereziki uholdeek eragiten ohi dituzten arazoak saihestu nahi ditu. Izan ere, Pascual Borja AMVISAKO presidenteak adierazi duenez, helburua da "drainatze sareak behar bezala funtzionatzen duela bermatzea", betebehar hori  "funtsezkoa baita euri urak husteko eta euri jasek, ur pilaketek edo sareko buxadurek eragindako gorabeherak prebenitzeko".

Besteak beste, prebentziozko mantentze lanak eta garbiketa eta buxadurak kentzeko zuzenketa lanak egingo dituzte, xurgapen eta presio handiko ur bultzada ekipoak erabilita. Materia organikoa, hondakin solidoak, sustraiak eta uraren zirkulazioa oztopatu dezakeen beste edozein elementu garaiz kendu nahi dituzte.

24/365 guardia zerbitzuaren bidez, hiriko edozein puntutan premiazko gorabeherei erantzuna eman nahi dute. Aurreratu dute "hiriguneko edozein tokitan 30 minutu baino gutxiagoan esku hartzeko" behar diren giza baliabideak eta baliabide materialak eskura egongo direla.