Ekain Albite (Zumaia, 1999) 2026ko Ikusmira Berriak programako egoiliarretako bat da. Euskal Herritik Georgiarainoko bidaia egin berri du Akira izeneko bere lan berriaren lokalizazioak topatzeko helburuarekin. Hain zuzen ere, idazten ari den bere banakako lehen filma izango den horretarako gauean igarotzen den bidaia espektral bat proposatu du, eta pertsonaia nagusiek egingo duten bidaia bera egin du: Euskal Herritik abiatu eta Georgiaraino.

Bidaia horretatik itzuli eta jarraian hasi zuen bere egonaldia Ikusmira Berriak programan. Apirilaren 19ra bitarte burutu duen lehen fasean, Santiago Fillol argentinarra izan du tutore, besteak beste, eta aurki batuko da ere Alexandre Koberidze georgiarrarekin. Irailean helduko da bigarren fasea, eta baita industriako ordezkariekin harremanak egiteko unea ere.

Negu Hurbilak (2024) film kolektiboarekin Locarno, SEMINCI eta tankerako hainbat jaialdi esanguratsuetatik igaro ostean, gogotsu heldu dio zumaiarrak bakarkako lehen lan luzearen garapenari. Izan ere, bidaian ikasi eta ikusitakoa jalki eta prozesatzeko unea du orain.

Bere lanerako espazioa den Tabakalerako 2DEO laborategian elkartu gara harekin, bere lanaren inguruko xehetasunak ezagutzeko: