Zuzendaria: Stanley Kubrick

Urtea: 1968

Herrialdea: Erresuma Batua

Iraupena: 139 min.

Generoa: Zientzian fikzioa | Kultuzko lana

Stanley Kubrickek 1968an estreinatutako 2001: A Space Odyssey ez da zientzia-fikziozko film arrunt bat. Gizakiari buruzko filma da, eta teknologiaren bidez bere burua gainditzeko duen obsesioari buruzkoa. Arthur C. Clarkerekin batera sortutako lanak espazioaren esplorazioa aitzakia bihurtzen du eboluzioaz, adimenaz eta teknologiaren botereaz hausnartzeko.

Filma Afrikako sabanan hasten da, gizakiaren arbasoen artean. Monolito misteriotsu baten agerpenak aldaketa eragiten du haien portaeran: tresnak erabiltzen ikasten dute, eta horrek bizirauteko eta beste espezieen aurrean nagusitzeko aukera ematen die. Kubrickek hemen lehen ideia nagusia planteatzen du: teknologiak gizakia eraldatu egiten du.

Milaka urte geroago, gizateria Ilargira iritsi da eta teknologia sofistikatuak garatu ditu. Baina aurrerapen horrek ez du gizakia zertan gizatiarrago bihurtu. Kontraste hori Kubricken begirada kritikoaren muinean dago: espezieak aurrera egin du teknikoki, baina galdera irekita dago ea benetan eboluzionatu ote duen.

Ikus-entzunezko tratamenduari dagokionean ere filmak bere garaia gainditu zuen: Kubrickek espazioaren isiltasuna, plano luzeak eta mugimendu motelak erabili zituen ikuslea ia hipnotizatzeko, eta musika klasikoaren erabilerak, epopeia bilakatu zituen espazioko eszenak.

Urteen igarotzearekin, 2001: A Space Odyssey kultuzko filma bilakatu da, ez bakarrik zientzia-fikzioaren historian mugarri izan zelako, baizik eta ikusleengan eragin iraunkorra sortu eta oraindik ere interpretazio eta eztabaida ugari eragiten dituelako.

Filma Movistar+ eta Prime Video plataformen katalogoan aurki dezakezue.