Яна даслала яму эмодзі зайца — праз тры гады яны ажаніліся.

Алеся Іванчанка і Максім Заяц. Фота тут і далей: сацсеткі Іванчанкі

Беларускі комік і імправізатар Максім Заяц ажаніўся з расійскай вядучай і актрысай Алесяй Іванчанкай. Вяселле згулялі 25 ліпеня ў Маскве, але да апошняга трымалі яго ў сакрэце. Пра падзею прыхільнікі даведаліся ўжо ў дзень урачыстасці, калі Іванчанка апублікавала фота ў вясельнай сукенцы з подпісам: «Мы сёння жэнімся, а вы што?»

Для выхаду маладыя выбралі беларускую песню — знакамітую «Завіруху» вакальна-інструментальнага ансамбля «Верасы». На цырымонію прыехалі бацькі жаніха з Беларусі і бацькі нявесты з Краснадарскага краю.

Праводзіла цырымонію сяброўка нявесты, камікеса Ліза Юшчук. Яна звярнулася да маладых словамі: «Алеся, ты прымусіла Максіма паверыць у астралогію, а ты, Максім, прымусіў Алесю паверыць у каханне». Пасля гэтых слоў Іванчанка расплакалася.

Заручальныя пярсцёнкі вынес беларускі комік, калега Зайца па камандзе «Мінскія» Сяргей Гарох — з плюшавым парасяткам Пухляй на руках.

Скрыншот з відэа гасцей вяселля

Цацку ў асяроддзі пары называюць іх сямейным талісманам. Так, Алеся ставіцца да Пухлі амаль як да жывога члена сям’і: бярэ яго з сабой у падарожжы, размаўляе з ім і нават раіцца. Максім гэта падтрымлівае.

На гэтым жартоўная частка не скончылася. Сувядоўца Іванчанкі па шоу «Натальная карта» Дзмітрый Жураўлёў з’явіўся ў гусарскім мундзіры, а пазней разам з казацкім хорам выканаў «Люба, братцы, люба». 

Вяселле аформілі палявымі кветкамі, кветкавымі прынтамі і выявамі зайцаў — відавочнай адсылкай да сцэнічнага прозвішча жаніха. Іванчанка пазней патлумачыла, што ім хацелася не «карцінкі для сацсетак», а звычайнага цёплага свята.

Скрыншот з відэа гасцей вяселля

«Галоўным для нас было, каб усе былі смачна накормленыя, адчувалі сябе камфортна, як дома. У нас не было ніякага дрэс-коду і іншых эстэцкіх штучак, якія нам не ўласцівыя. Хацелася проста па-чалавечы і ад душы пагуляць, як кажуць на Кубані», — напісала яна.

Паводле Іванчанкі, падрыхтоўку да вяселля хавалі наўмысна. Госці падтрымалі просьбу маладых і да самога свята нічога не публікавалі.

«Бываюць такія этапы ў жыцці, якія ты аберагаеш, хочаш пражыць ціхенька для сябе і гатовы падзяліцца гэтым толькі постфактум. І ўся наша банда гасцей падтрымала нашу просьбу», — патлумачыла яна.

Сапраўднае прозвішча 36‑гадовага коміка — Загайскі. Ён нарадзіўся ў Мінску, вучыўся ў Беларускім дзяржаўным універсітэце фізічнай культуры, займаўся КВЗ і працаваў вядоўцам вяселляў ды карпаратываў.

Шырэйшай аўдыторыі Заяц стаў вядомы пасля ўдзелу ва ўкраінскім шоу «Рассмяшы коміка». У адным з выпускаў яму ўдалося пяць разоў рассмяшыць Уладзіміра Зяленскага і Яўгена Кашавога і выйграць 50 тысяч грыўняў. Разам з Арцёмам Гаўсам ён таксама выступаў у расійскім «Камеды Батл».

Найбольшую пазнавальнасць Заяц атрымаў як удзельнік каманды «Мінскія». У 2020 годзе яна перамагла ў першым тэлевізійным сезоне шоу «Імправізацыя. Каманды», а ў двух наступных дайшла да фіналу. Пазней удзельнікі «Мінскіх» далучыліся да праекта «ДВИЖ», дзе Максім таксама стаў адным з вядоўцаў размоўнага шоу «ОТЫДО». 

Алеся Іванчанка нарадзілася ў станіцы Калужскай Краснадарскага краю. Яна скончыла школу з залатым медалём, вучылася ў Кубанскім дзяржаўным універсітэце і яшчэ ў студэнцкія гады пачала гуляць у КВЗ. У складзе «Планеты Сочы» выступала ў тэлевізійнай Прэм’ер-лізе, а таксама трапляла ў Міжнародную лігу КВЗ у Мінску.

Сапраўдная папулярнасць прыйшла да Іванчанкі ў 2023 годзе дзякуючы шоу «Натальная карта». У ім яна ў вобразе астролага разбірае гараскопы вядомых гасцей, а Дзмітрый Жураўлёў спрабуе супрацьпаставіць яе прадказанням логіку і скептыцызм. Пазней Іванчанка стала вядоўцай шоу «Хуткія спатканні», а таксама сыграла галоўную ролю ў серыяле «Няня Оксана». 

Максім і Алеся пазнаёміліся ў сацсетках у 2023 годзе. Заяц дадаў Іванчанку ў сябры, але сам доўгі час не рабіў наступнага кроку. Урэшце першай напісала Алеся: напярэдадні Новага года яна даслала яму эмодзі зайца. 

Яшчэ да пачатку рамана Іванчанка склала натальную карту Максіма і, паводле зорак, яны нібыта не вельмі пасавалі адно аднаму. Праз тры гады пара ўсё ж дайшла да вяселля. 

Усе навіны →