სამარაში პარასკევს ღამით, 15 აგვისტოს, სარაკეტო დარტყმა განხორციელდა „სამრეწველო საწარმოზე“, განაცხადა სამარის ოლქის გუბერნატორმა ვიაჩესლავ ფედორიშჩევმა. მას არ დაუკონკრეტებია, კერძოდ რომელ საწარმოზეა საუბარი. მოგვიანებით ფედორიშჩევმა დაწერა, რომ თავდასხმის შედეგად არიან დაღუპულები არ, დაშავდა ორი ადამიანი. სამარის მერმა ივან ნოსკოვმაც განაცხადა დაშავებულების შესახებ, თუმცა რიცხვები არ დაუსახელებია.

მონიტორინგის უკრაინული ტელეგრამის არხები წერენ, რომ ერთ-ერთი რაკეტა მოხვდა „პროგრესის“ მთავარ საამქროს - რუსეთის სარაკეტო-კოსმოსური დარგის ერთ-ერთ წამყვან საწარმოს, სადაც „სოიუზის“ ოჯახის რაკეტებს აწარმოებენ. იქ ხანძარი გაჩნდა.

გამოცემა ASTRA-ს OSINT-ანალიტიკოსი ამტკიცებს, რომ სამარაში თავდასხმის შედეგად ცეცხლი გაუჩნდა სააქციო საზოგადოება „ავიაკორ-საავიაციო ქარხნის“ ან სააქციო საზოგადოება „პროგრესის“ საამქროს: ეს საწარმოები უშუალოდ ემიჯნება ერთმანეთს.

სავარაუდოდ, დარტყმა განხორციელდა შორ მანძილზე მოქმედი უკრაინული ფრთოსანი რაკეტებით - „ფლამინგოთი“. უკრაინული კომპანია Fire Point-ის მთავარმა კონსტრუქტორმა დენის შტილერმანმა, რომელიც „ფლამინგოს“ აწარმოებს, სოციალურ ქსელ X-ში გამოაქვეყნა რაკეტის გაშვებისა და დარტყმის შედეგების ამსახველი ვიდეოები.

წუხელ აფეთქებების ხმა ასევე ისმოდა ნიჟნი-ნოვგოროდის ოლქში, სავასლეიკის აეროდრომის მიდამოებში, იუწყება უკრაინული მედია OSINT-არხებზე დაყრდნობით. სავარაუდოდ, სწორედ იქ არიან ბაზირებული თვითმფრინავები მიგ-31K, რომლებსაც რაკეტა „კინჟალი“ გადააქვთ. ამ ინფორმაციის ოფიციალური დადასტურება არ მოიპოვება.

მოსკოვის ოლქის გუბერნატორმა ანდრეი ვორობიოვმა განაცხადა, რომ სანამ საჰაერო თავდაცვა რეგიონზე უკრაინული დრონების თავდასხმას იგერიებდა, შატურაში კერძო სახლს დაეცა უპილოტო საფრენი აპარატი, დაშავდა ორი ადამიანი, მათ შორის ცხრა წლის ბავშვი. ბიჭი მძიმე მდგომარეობაშია.

მოსკოვის მერმა სერგეი სობიანინმა განაცხადა 15 უპილოტო საფრენი აპარატის განადგურების შესახებ, რომლებიც ქალაქის მიმართულებით მიფრინავდა. ტულის ოლქში ხელისუფლებამ განაცხადა 22 ჩამოგდებული დრონის შესახებ, იაროსლავლის ოლქში - ხუთი ნეიტრალიზებული უპილოტო საფრენი აპარატის შესახებ. რუსეთის მიერ ანექსირებული სევასტოპოლის დე ფაქტო ხელმძღვანელმა მიხაილ რაზვოჟაევმა განაცხადა ხუთი ჩამოგდებული დრონის შესახებ.

როსტოვის ოლქზე უკრაინული დრონების თავდასხმის შემდეგ მილეროვოს რაიონის ათასამდე მცხოვრები ელექტროენერგიის გარეშე დარჩა, განაცხადა გუბერნატორის მოვალეობის შემსრულებელმა იური სლიუსარმა.

პენზის გუბერნატორმა ოლეგ მელნიჩენკომ დაწერა უპილოტო საფრენი აპარატების თავდასხმის შედეგად ზემეტჩინოს რაიონის სამრეწველო ზონაში არსებულ სასოფლო-სამეურნეო საწარმოში გაჩენილი ხანძრის შესახებ. მისი თქმით, არავინ დაშავებულა.

თავდასხმების გამო დროებითი შეზღუდვები დაწესდა ყაზანის, ნიჟნი-ნოვგოროდის, სამარის, სარატოვის, ულიანოვსკის, ჩებოქსარის, სოჭის, ფსკოვის, ვოლგოგრადის, პენზისა და იაროსლავლის აეროპორტებში, ასევე მოსკოვის აეროპორტებში - დომოდედოვოში, ვნუკოვოსა და ჟუკოვსკიში, და სანქტ-პეტერბურგის პულკოვოში.

რუსეთის თავდაცვის სამინისტრომ განაცხადა რუსეთის რეგიონების, ანექსირებული ყირიმის, აზოვისა და შავი ზღვების თავზე 598 უკრაინული უპილოტო საფრენი აპარატის გადატაცებისა და განადგურების შესახებ. ამასთან, სამარის ოლქი, სადაც „ფლამინგოები“ ჩაფრინდა, ანგარიშში მოხსენიებული არ არის.