Brunsniglar har sidan 1988 invadert hagar over nesten heile Noreg.

Voss er ikkje unntaket. Der leitar Kikki Sørgård under in busk og drar fram det ho meiner har endra hagen hennar mykje, ei snigelfelle.

– Du fyller på her, på det som er meir som toppen av ei brusflaske, og så kjem sniglane inn her. Dei et Ferramol og så døyr dei etterpå.

Tidlegare kunne ho finne og klippe rundt 400 brunsniglar på ein kveld i hagen sin, men det er endra no.

– I går kveld var det fem.

Voss hagelag kjøpte i år, med støtte frå sponsorar, inn 150 kilo med snigelmiddel. Dette har dei delt ut gratis til hageeigarar, blant anna på medlemsmøte.

– Me har gjort det rett og slett fordi me vil bli kvitt brunsnigelen. Det er veldig viktig, ikkje minst for mattryggleiken, seier formann Jan-Ove Nordvik i Voss hagelag.

– Voss er ei matbygd, og det er veldig viktig at bønder ikkje blir angripne endå meir av brunsnigelen enn det dei er i dag.

Voss hagelag har kjøpt inn to forskjellige jernfosfatmiddel. Det eine må ein ha autorisasjon for kjøp og bruk. Difor har hagelaget lagt det ut på gravplassar og liknande, der personar med sprøytesertifikat kan nytte dette. Det andre må ein ikkje ha autorisasjon for.

Snigelmiddel består av jernfosfat som stoppar sniglane frå å ete og dei kryp vekk, gjerne under jorda, for å døy. For andre enn sniglane skal middelet vere trygt.

– Det fungerer som berre det. Eg har ikkje tal på kor mange sniglar Voss hagelag no har på samvitet, men me har mange, mange, mange tusen, seier Nordvik.

Likevel er ikkje snigelmiddel for alle. Assisterande butikksjef Kai Terje Stenkjær på Felleskjøpet Voss innrømmer at jernfosfatmiddel er dyrt.

– Blomane du kjøper som blir etne av brunsniglane er dyre dei også, så det er ei økonomisk vinning der, kan du seie.

Han innrømmer også at middel ikkje er den einaste løysinga.

– Det er eit veldig godt middel, men det trengst meir til for å overvinne problemet.

Bjørn Arild Hatteland er forskar ved Norsk institutt for bioøkonomi, og har forska blant anna på brunsniglar.

– Jernfosfatmiddel kan ha ein del effekt. Me har sett i forsøk at Sluxx, som er ei meir konsentrert utgåve av Ferramol, kan ha ganske god effekt, samanlikna med andre middel ein får tak i.

– Det er vel som med mange ting, at det hjelper viss mange går i lag om noko.

Hatteland har fleire råd for å få redusert snigelbestanden.

Han seier ein kan følge med på våren kvar sniglane kjem frå, og bruke middel tidleg i sesongen i mai/juni.

På hausten er eitt råd å rydde i hagen og få snigelegg fram i sola, sånn at ein blir kvitt snigelegg, for ein snigel åleine kan legge opp til 400 egg.

Klipping må også framleis til.

– Det er ein dugnad. Alle må gjere det, viss ikkje vil me ikkje bli kvitt det, seier hageeigar Kikki Sørgård.

For ho skjer klippinga no langt sjeldnare etter at ho tok i bruk snigelmiddel.

– Det er deilig. No kan eg gjere andre ting i hagen enn å berre jakte sniglar, seier ho og ler.