O presidente da Deputación de Pontevedra, Luis López, e a vicepresidenta, Luisa Sánchez, recoñeceron este venres a figura de Iago Aspas como un dos grandes referentes dos valores que promove a provincia do deporte con motivo da celebración da Gala do Deporte que organiza cada ano a institución provincial e que, nesta ocasión, rendeu homenaxe ao capitán do Celta. O retraso na viaxe do equipo vigués dende Glasgow impediu que Iago estivese presente. Foi representado polo seu irmán Pablo e por Atilano Vecino.

Baixo o lema «Son porque somos», a Deputación puxo en valor a contribución dos deportistas, dos clubs, das institucións e das familias para construír, entre todos, a provincia do deporte. «Somos unha provincia que respira deporte polos catro puntos cardinais e na Deputación nada nos comprace máis que acompañar a vosa misión, apoiar os vosos proxectos e desfrutar dos vosos éxitos. Ese é o noso obxectivo e o que está detrás dos catro piares que sustentan a nosa aposta pola provincia do deporte», afirmou o mandatario provincial para pechar unha gala á que asistiron máis de 700 persoas estreitamente relacionadas co ámbito do deporte provincial.

Luisa Sánchez, Atilano Vecino, Pablo Aspas e Luis López. / Jose Lores

Por segundo ano consecutivo, a Deputación escolleu o Ifevi. Conducida polos comunicadores Raquel Doiro (Pitu) e Rafa Valero, o evento contou con grandes deportistas da provincia como a piragüista Teresa Portela, o patinador Chevi Guzmán ou a ximnasta Melania Rodríguez. A vicepresidenta Luisa Sánchez foi a encargada de darlle a benvida a todos os asistentes e poñer en valor o papel que desempeñan clubs, corpos técnicos, familias, amizades e mesmo rivais no crecemento profesional dos deportistas. «Ningún deportista chega lonxe por si só, hai que poñer en valor o papel de todas as persoas que acompañan as traxectorias deportivas, tamén aquelas que non soben ao podio», subliñou Sánchez.

A gala estruturouse en catro bloques estreitamente relacionados coa provincia do deporte como son os grandes eventos deportivos, os programas de apoio da Deputación aos clubs, a creación de eventos propios por parte do organismo provincial e, finalmente, a homenaxe aos deportistas personificados na figura de Iago Aspas.

Elaboración do cadro en directo. / Jose Lores

Luis López destacou a aposta estratéxica polo deporte que, en materia de instalacións deportivas de titularidade municipal tradúcese no investimento de 28M€ por parte da Deputación nun total de 278 equipamentos dos 61 concellos da provincia, incluídos estadios como Balaídos ou Pasarón. Un compromiso que, a través do programa Prodeporte, se amplía en 1,8 millóns de euros para mellorar as instalacións dos clubs entidades. Un dos momentos singulares foi o anuncio dun novo perfil oficial de Instagram, unha plataforma chamada @provinciadodeporte.