https://sputnik-abkhazia.info/20260923/ishydydua-eish-a-auam-aa-azyrbo-zhlar-razgaaraei-azhaaei-1065812837.html

"Ишыдыдуа еиԥш қәа ауам": ақәа азырбо жәлар разгәаҭарақәеи ажәаԥҟақәеи

"Ишыдыдуа еиԥш қәа ауам": ақәа азырбо жәлар разгәаҭарақәеи ажәаԥҟақәеи

Sputnik Аҧсны

Адгьыл анҿажәкуа аԥсы ҭанаҵоит – ақәа. Ақәа иахҳәаау азгәаҭарақәеи ажәаԥҟақәеи шәрыԥхьарц шәылшоит Аԥсуаҭҵааратә институт афольклортә лабораториа аусзуҩ... 23.09.2026, Sputnik Аҧсны

2026-09-23T08:30+0300

2026-09-23T08:30+0300

2026-09-23T09:44+0300

аԥсны

жәлар рдоуҳа

аԥсны

https://cdnn1.img.sputnik-abkhazia.info/img/102843/37/1028433712_0:160:3072:1888_1920x0_80_0_0_b723f3c2b5a8af6e3665565c969cba58.jpg

Ақәа цәыкәбарқәа хәмаруа илеиуеит Адгьыл иналаӡаҭы ицарц. Амра адгьыл агәышҵа арԥхозар, ақәа адгьыл анҿажәкуа "аӡы аҿанархәхәоит". Инеибеиԥшны акыраамҭа ианшоуроу ақәа анааулак: асабақәа артәоит, аҳауа ҿыхаӡа иҟанаҵоит, адгьылгьы аԥсы ааивнагоит. Иааиԥмырҟьаӡакәа амра ԥхозар, ԥҭак хымлар, ақәа адгьыл амырцәаакыр, ҳзышьцылахьоу ашәаԥыџьаԥ хҩаауеит, ауаа рурақәа ҵнашәаауеит. Еилыукаартә иҟоуп аԥсуаа "ианаамҭоу ақәа, ианаамҭоу амра" зырҳәауа. Ақәеи ажәлар разгәаҭарақәеиАԥсуа жәлар разгәаҭарақәа аԥсҭазаара ирнаҭоз аԥышәеи рдоуҳатә хдырреи ирылҵшәоуп. Урҭ рыхкқәа шырацәоугьы, еиҳараӡак изызку амш аҽеиҭакреи аҳауатә ҭагылазаашьеи роуп. Ҳҽыргәылаҳхалап аҿырԥштәқәа: • Ақәарԥсса кыр инаскьоит, ақәаршҩы ӷәӷәа лассы ихнагоит, — рҳәоит аԥсуаа. • Ақәа ӷәӷәа анаулак адыдра мыцхәы ихҭанакыр, амш еилгоит. • Аҵәаҟәа амрагыларахь икыдлар, ашоура бааԥс иазҳәоуп, амраҭашәарахь – ақәаршҩы леиуеит. • Ацәаҟәа амш аныбзиоу ихылар, лассы ақәа леиуеит. • Аҷнышқәа еиқәҿырҭуа иалагазар – ақәа рбоит. • Амраҭашәара ажәҩан анҵыблаа – ақәа иатәуп. • Аԥхын амра мыцхәы иӷьызар, ақәоура иазҳәоуп. • Амраҭашәарахь ашәаԥшь ыҟазар, ақәа ауӡом. • Ажәҩан аҿы амза ахаҿра аныхәашь – ақәа иатәуп. • Амш шыбзиоу амшын ацәқәырԥақәа анаӷьха – ақәа ауеит. • Аҟәраанқәа аҵлаҿ рыбжьы гозар, ақәа иатәуп. • Амш анбзиоу абгахәыҷқәа ауура иалагар – ақәоура иазҳәоуп. • Ианаарҩароу адаӷь шьны агәы ажәҩан ахь иҩарханы ишьҭоуҵар, ақәа ауеит рҳәоит. • Аԥша ҟәанда асуазар, ақәа иазҳәоуп. • Шьыжьнаҵы ақәоура иалагар, ирласны ихкәоит. Хәылԥазы иалагар, лассы ихкәом. Ахыркәшамҭаз жәаԥҟақәак• Ишыдыдуа еиԥш қәа ауам. Агәыӷра ианакәызаалак ауаҩы ицуп иниԥырымшәаӡо. Аҳәатәы хауҵар, иалшоит алашьцараҿынтә алашарахь ухьарԥшра. Угәы каумыжьыр, уҽурӷәӷәар ауадаҩрақәа рҿагылара шулшо атәы ҳаҵанаҳәоит ари ажәаԥҟа. • Ақәа ицәгылаз ахьча ирахә бзаҳәуеит. Имаашьаз, ауадаҩра, аџьабаа зхы ацәызмыхьчаз ауаҩы иусқәа маншәалахоит. • Ақәа аура нукылар ҟалап, ахаҵацара иақәызкыз аԥҳәызба лынкылара аиҳа. Ажәаԥҟа инаҵшьны иаҳнарбоит агәҭакы, ма агәаӷьра аумаӡа шаҵанакуа. Иҟалалоит аԥҳәызба лыгәаӷьра аԥсабаратә цәырҵрақәа раасҭа ианыӷәӷәоугьы.

https://sputnik-abkhazia.info/20240727/azhlar-luanyt-iysychar-amshyn-anarboit-amshyni-amshynt-lesikei-znyshua-azhaaa-1051759558.html

https://sputnik-abkhazia.info/20200708/Zhlar-rdoua-aniaa-azhaaa-iryzkny-1030493562.html

2026

Ажәабжьқәа

ab_AB

https://cdnn1.img.sputnik-abkhazia.info/img/102843/37/1028433712_171:0:2902:2048_1920x0_80_0_0_39a67da05b2127eb6ef45e9ab1a9029a.jpg

жәлар рдоуҳа, аԥсны

Адгьыл анҿажәкуа аԥсы ҭанаҵоит – ақәа. Ақәа иахҳәаау азгәаҭарақәеи ажәаԥҟақәеи шәрыԥхьарц шәылшоит Аԥсуаҭҵааратә институт афольклортә лабораториа аусзуҩ Сусанна Ҭаниаԥҳа лматериал аҟны.