Sagardozaleek hitzordu garrantzitsua izango dute larunbat honetan Errezilen. Izan ere, bertan egingo da, hamairugarrenez, Errezilgo Sagardo Txapelketa Herrikoia. Herriko frontoian jokatuko dute lehia, 20:00etan hasita, eta guztira, hemezortzi baserrik edo sagardo etxek parte hartuko dute. Honako baserrietako ekoizleak izango dira lehian: Urdalleta, Agerre Goikoa, Buztinzuri, Irure Txiki, Estrada Zaharra, Lasturreta, Aritzeta Goikoa, Ibarguren, Galarraga saletxe, Aranguren, Zuazketa, Zumeta, Iraola Zaharra, Basabe, Aritzeta Azpikoa, Mugarrieta, Muno Haundi eta Erdoizta.

Ez da ordea, sagardoa bakarrik izango. Festa giroa nagusituko da herriko pilotalekuan eta edatekoaz gainera, pintxoak, postrea eta kafea ere izango dituzte gerturatzen direnek.

Parte hartu ahal izateko baina, sarrera ordainduko beharko da, 12 eta 15 urte bitartekoek 15 euro ordaindu beharko dute eta 20 euro, adin tarte horretatik gorakoek.

Gaztetandik kultur elkarteak eta Errezilgo Udalak antolatu ohi dute urtero sagardo lehiaketa. Iazko edizioan, Arabe baserriak irabazi zuen txapelketa. Bigarren postua Arangurenen ekoitzitako sagardoak eskuratu zuen, eta hirugarren saria Estrada Zaharra-rentzat izan zen. XII. edizio hartan, Araberentzat izan zen baita ere herritarren saria.

Beraz, nork onduko ote du aurtengoan Arabe baserriko sagardoa ala, onduko al du norbaitek?