Hiri Antolamendurako Plan Orokorraren (HAPO) tramitazioa berraktibatzeko, Udalak aholku kontseiluaren osaera berritzeko deialdia egin du. Herriko elkarte eta eragileek osatutako organo kontsultiboa da, eta HAPOaren prestaketan eta tramitazioan aholkularitza eta ekarpenak egiteko eginkizuna du. 2025eko otsailean egin zen kontseilua berritzeko azken deialdia. Ordutik hona, HAPOaren dokumentazioa lantzen jarraitu da, eta udal gobernuaren asmoa da datozen hilabeteetan planaren behin-behineko onarpena izapidetzea.Horretarako, lehenik eta behin, berriro eratu behar da aholku kontseilua.

Batzorde aholkularian parte hartu nahi duten herriko elkarte eta herri-eragileek irailaren 18a baino lehen aurkeztu beharko dute eskaera udal erregistroan telematikoki edo aurrez aurre.

Udal ordezkaritza duten alderdi politikoez gain, ondorengo arloetan jarduten duten elkarte eta eragileek parte hartu ahal izango dute: landa auzoak, auzo-elkarteak, ingurumenaren babesa, abelzaintza eta nekazaritza, basogintza, kultur ondarea, kirola, dibertsitate funtzionala, merkataritza eta ostalaritza, mugikortasun iraunkorra, enpresa-elkarteak, sindikatuak, gazteria, hirugarren adina, talde feministak, kultur- eta jatorri-aniztasuna eta eskola-komunitatea, besteak beste.

Legez eratutako elkarteetako nahizbestelako herri-eragile antolatuetako ordezkariak izan daitezke aholku kontseiluko kide. Norbanakoek ezin dute parte hartu.

Behin organoa eratuta, lehenengo bilera urrian egitea aurreikusten da. Lehenengo lanak Hiri Antolamendurako Plan Orokorraren (HAPO) behin-behineko dokumentua aztertzea eta haren inguruko iritzia ematea izango dira. Plana onartu ostean ere, egiturazko antolamenduari eragiten dioten berrikuspen, aldaketa edo plangintza-tresna berriak izapidetzen direnean ere elkartuko da, prozesu horien berri jaso eta bere iritzia emateko.

Aholku kontseiluaren eraketa prozesuarekin batera, HAPOaren hasierako onarpenerako edukia eta irizpide nagusiak ezagutzeko aukera izango dute herritar guztiek. Irailaren 1ean, astelehenetik ostiralera, 10:00tatik 18:00etara, jendaurreko erakusketa egongo da Santa Ana antzokian.

Bertan, planaren proposamen nagusiak, aurreikusitako garapenak eta etorkizuneko Oñatirako planteatzen diren irizpideak azalduko dira. Era berean, irailaren 17an, arratsaldeko 18:00tan, azalpen saio bat egingo da, HAPOaren nondik norakoak azaltzeko eta prozesuaren hurrengo urratsen berri emateko.

Hiri Antolamendurako Plan Orokorrak datozen hamarkadetan Oñatiko lurralde-antolamendua baldintzatuko du; besteak beste, etxebizitzak, jarduera ekonomikoak, ekipamendu publikoak, azpiegiturak eta espazio berdeak non kokatuko diren zehaztuz. Horregatik, Udalak elkarte eta eragileei dei egiten die aholku kontseiluan parte hartu eta herriaren etorkizunaren inguruko hausnarketan ekarpenak egin ditzaten.