Dei to første utanlandskablane mellom Noreg og Danmark blei lagde på 70-talet.

I sommar oppstod det ein feil på den eine kabelen, Skagerrak 2.

Måndag skriv Statnett i ei nyheitsmelding at kabelen er fiksa.

– Vi kunne nokså tidleg slå fast at det var snakk om ein slitasjeskade og ikkje sabotasje, seier Werner Schuhmacher i Statnett i meldinga.

Statnett og danske Energinet har brukt 160 millionar på fikse kabelen.

Statnett opplyser at dette var noko høgare enn dei hadde rekna med. Det skuldast at dei trengde noko lenger tid til reparasjonsarbeidet.

– Reparasjon av sjøkabel er omfattande og involverer fleire aktivitetar. Det blei stilt krav til fagkompetanse, samarbeid og gjennomføring under varierande verforhold.

Ifølgje Energiwatch, som først omtala at kabelen var i orden, har Statnett og Energinet tapt 96,8 millionar på driftsstansen. Dette skuldast at dei har gått glipp av såkalla flaskehalsinntekter.

Dei to utanlandskablane blei lagde i ei tid då Noreg trengde å betre forsyningstryggleiken. Femti år seinare har fleire parti teke til orde for at ein ikkje skal legge nye kablar når levetida for Skagerrak 1 og 2 er over.

Difor vekker det reaksjonar at Statnett sette i gang vedlikehaldsarbeidet i sommar.

Maren Grøthe (Sp) sende 25. september eit spørsmål til energiminister Terje Åsland (Ap) om saka.

Der spør ho om det er rett «å bruke 130-160 millionar kroner på å reparere ein kabel som når si tekniske levetid i 2027».

Energiministeren har enno ikkje svart på dette spørsmålet.

Statnett vurderer no om dei skal søke om konsesjon for å erstatte Skagerrak 1 og 2.

I sommar varsla Sp-leiar Trygve Slagsvold Vedum at han vil ta saka til Stortinget. Han meiner Stortinget må pålegge regjeringa å instruerer Statnett til å avslutte arbeidet med nye kablar.

Den gong svara Terje Åsland slik på kritikken.

– Statnett vurderer også eit alternativ der dei eldste kablane ikkje blir erstatta når dei sluttar å fungere. I så fall blir det ingenting å ta stilling til. Så lenge Statnett ikkje har sendt ein slik søknad, er det heller ikkje noko å seie ja eller nei til.

Ap har programfesta at dei to eldste kablane ikkje skal fornyast.