Саха Өрөспүүбүлүкэтин экэниэмикэҕэ миниистирэ Петр Попов үөрэх уонна наука министиэристибэтин, РНА Саха сиринээҕи салаатын П.И. Мельников аатынан Ирбэт тоҥу үөрэтэр институтун уонна Арктикатааҕы чинчийэр киин салалтатын кытта оробуочай мунньаҕы ыытта.

Өрөспүүбүлүкэ экэниэмикэҕэ министиэристибэтэ иһитиннэрбитинэн, мунньах кэмигэр эрэгийиэн сиригэр-уотугар Уһук Илиннээҕи айылҕа-килиимэт киинин Саха сиринээҕи салаатын — ирбэт тоҥу үөрэтэр уонна экэниэмикэни килиимэт уларыйыытыгар сөп түбэһиннэрэргэ туһаайыллыбыт научнай тэрилтэни тэрийии боппуруостара ырытылыннылар.

Мунньах кыттыылаахтара киини тэрийии тэрээһин боппуруостарын, научнай-чинчийэр бырагырааматын, ону тэҥэ биэдэмистибэлэр икки ардыларынааҕы бииргэ үлэлэһии мэхэньиисимнэрин дьүүллэстилэр. Геокриологическай кэтээн көрүү эрэгийиэннээҕи ситимин сайыннарыы, дьиэлэр, суоллар уонна атын да эбийиэктэр ирбэт тоҥ ириитин усулуобуйатыгар туруктарын сыаналааһын, ону тэҥэ кутталы намтатарга инженернэй быһаарыылары оҥоруу боппуруостарыгар ураты болҕомто уурулунна.

Мунньах кэмигэр саҥа киин научнай баазатынан криолитозона эйгэтигэр ураты билиилээх-көрүүлээх Ирбэт тоҥу үөрэтэр институт, Арктикатааҕы чинчийэр киин  уонна эрэгийиэн сайдыытыгар анаан прикладной чинчийиилэри сүрүннүүр атын научнай тэрилтэлэр буолуохтарын сөбүн бэлиэтээтилэр. Киини тэрийии чэрчитинэн тэрээһин өттүнэн арыаллааһыны үөрэх уонна наука министиэристибэтэ хааччыйыаҕа.

«Бу научнай киини тэрийии уларыйыылары тиһигин быспакка кэтээн көрөргө, ол иһигэр адаптация миэрэлэрин олоххо киллэрии чааһыгар, быраактыка быһаарыыларын ылынарга научнай чахчыларга тирэҕирэр, ону тэҥэ геокриология эйгэтигэр идэлээх исписэлиистэри бэлэмниир кыаҕы биэриэҕэ. Биһиги научнай институттарбыт сатабылларын холбооһун синергетическай көдьүүһү биэриэҕэ уонна фундаментальнай чинчийиилэр түмүктэрин өрөспүүбүлүкэ экэниэмикэтигэр прикладной быһаарыыларга кубулутарга көмөлөһүөҕэ», — диэн экэниэмикэ миниистирэ Петр Попов бэлиэтээтэ.

РНА Уһук Илиннээҕи айылҕа-килиимэт киинин Саха сиринээҕи салаата  нэһилиэнньэлээх пууннары уонна бырамыысыланнас эбийиэктэрин килиимэт уларыйыытыттан харыстыыр сыалтан, ирбэт тоҥу үөрэтиигэ прикладной чинчийиилэринэн дьарыктаныаҕа.

Киини тэрийии туһунан сөбүлэһиини «ВЭФ-2026» чэрчитинэн, Ил Дархан Айсен Николаев уонна РНА вице-бэрэсидьиэнэ, Уһук Илиҥҥи салаатын бэрэссэдээтэлэ, академик Юрий Кульчин илии баттаабыттара.