Балаҕан ыйын 22 күнүгэр, оптуорунньукка, «Өлүөнэ очуостара» национальнай паарка экомаршрутун устун сылдьыбыт туристар эһэ кинилэр иннилэринэ ааспыт суолун көрбүттэрин туһунан ханааллларыгар суруйбуттара социальнай ситимнэргэ тарҕаммыта. Бу түбэлтэ ыалдьыттар да, паарка үлэһиттэрин да болҕомтолорун тарта.

Эһэ суола очуоска тахсыы тохсус тохтобулун кэнниттэн, маршрут үөһэ өттүгэр хаар түспүтүн кэннэ көстүбүт. Туристар, адьырҕа кыылы уун-утары көрсүбэтэхтэр, ол эрээри кини сибиэһэй суолун хаартыскаҕа түһэрэн, видеоҕа устан социальнай ситимнэргэ тарҕаппыттар. Паарка дириэктэрэ Аркадий Семенов итини бигэргэтэр, эһэ Өлүөнэ өрүс кытылын батыһан, сиһи туораан дебаркадер диэки тахсан туристар сылдьар зоналарыгар киирбитин эппит.

«Эһэ Өлүөнэ өрүс кытылын кыйа хааман, дебаркадер оройуонугар хапчаан устун киирэн экотропа сиригэр тахсыбыт. Кыыл ойуур өттүнэн киирбэтэх, онно «электропастух» лииньийэтэ туруоруллубут буолан, туруору очуостар өттүлэринэн, кытылынан өрө өксөйөн күрүөтэ суох сиринэн  киирбит. Билигин эһэ онно суох: туристическай зонаттан тахсыбыт. Хаар ууллан, суол-иис аны көстүбэт. Госинспектордар бары билэллэр, бэлэм сылдьаллар», – диэн Аркадий Семенов ЯСИА-ҕа иһитиннэрбит.

Паарка судаарыстыбаннай иниспиэктэрдэрэ балаҕан ыйын 22-23 күннэригэр ыттардаах рейдэ оҥорон, кыылы да, күрүө алдьаммытын да булбатахтар. Билигин бары үлэһиттэр сэрэхтээх буолуу эрэсиимигэр сылдьаллар. Сабаҕалааһын быһыытынан, кыыл электропастух лииньийэтин аннынан ааспыт – лииньийэ намыһах соҕус гына тардыллыбыт.

Аркадий Семенов «Өлүөнэ очуостара» — бу кыыл-сүөл дойдута буоларын, манна эһэлэр сыл ахсын маршруту быһа охсон ааһалларын санатта. Ол иһин ыалдьыттарга кини маннык быраабылалары тутуһарга: бөлөҕүнэн эрэ сылдьарга, болҕомтолоох уонна ас тобоҕун хаалларбат буоларга сүбэлиир.

Туристыыр сезон «Өлүөнэ очуостарыгар» балаҕан ыйын 26 күнүгэр диэри үлэлиир, оттон эһэлэр алтынньы бүтүүтэ – сэтинньи саҥатыгар арҕахха киирэллэр. Бу быһылаан хонтуруолга тутуллар, ол эрээри паарка салалтата ыалдьыттары сэрэхтээх буоларга уонна Арассыыйа бу ураты кэрэ муннугун айылҕатын ытыктыырга ыҥырар.

https://sakha-sire.ru/wp-content/uploads/2026/09/17728627214928.mp4