ᐃᕗᔾᔨᕕᖕᒥᐅᑦ ᑲᑎᓚᐅᖅᐳᑦ ᐋᒍᔅᑎ 13−ᒥ ᐃᓗᐃᓪᓚᕿᑎᓪᓗᒋᑦ ᑎᓴᒪᓂᒃ-ᐅᑭᐅᓕᒃ ᔫᓯ ᐳᓪᓚᔮᑦᒥᑦ ᐃᓚᖏᑦ ᕿᓂᖅᑎᓪᓗᒋᑦ ᑭᐅᔾᔪᑎᓂᑦ ᐃᓅᓕᓴᖅᑕᐅᓂᕐᒧᑦ ᐸᖅᑭᔭᐅᓂᖓᓂ ᐱᓚᐅᖅᑕᖓᓂ ᑐᖁᓚᐅᙱᓐᓂᖓᓂ.

ᐳᓪᓚᔮᑦ ᐃᓗᕕᖅᓯᐅᖅᑕᐅᓂᖓ ᐋᖅᑭᒃᑕᐅᓯᒪᓚᐅᖅᐳᖅ 1 ᐅᓐᓄᓴᒃᑯᑦ, ᐊᓈᓇᑦᑎᐊᖓ, ᐋᓂ ᒪᖏᐅᖅ, ᐅᖃᓚᐅᖅᐳᖅ ᓄᓇᓖᑦ ᕙᐃᔅᐳᒃᑯᑦ ᑲᑎᙵᓂᐅᔪᒥ.

ᒪᖏᐅᖅ ᓴᖅᑭᑎᑦᑎᓚᐅᖅᐳᖅ ᐃᓱᒫᓘᑕᐅᔪᓂ ᐃᕐᙳᑕᖓᑕ ᖃᓄᐃᓐᓂᖓᓂ ᑎᑎᕋᕐᓂᐅᔪᓂ ᓄᓇᓖᑦ ᕙᐃᔅᐳᒃᑯᑦ ᑲᑎᙵᓂᐅᔪᒥ ᑐᑯᕝᖁᓚᐅᙱᑎᓪᓗᒍ.

ᔪᓚᐃ 31−ᒥ ᑎᑎᕋᕐᓂᐅᔪᒥ, ᐅᖃᓚᐅᖅᐳᖅ ᓄᑲᑉᐱᐊᖅ ᐋᓐᓂᐊᖏᓐᓇᓚᐅᖅᐳᖅ ᓈᖓᓂᐅᔪᒥ, ᓂᕆᓚᐅᑦᑎᐊᕐᓇᓂ ᐱᓇᓱᐊᕈᓯᐅᑉ ᐅᖓᑖᓄᑦ ᐊᒻᒪ ᐃᓚᒌᑦ ᕿᓃᓐᓇᓚᐅᖅᐳᑦ ᐃᓅᓕᓴᖅᑕᐅᓂᕐᒧᑦ ᐃᑲᔪᖅᑕᐅᔪᒪᓂᕐᒧᑦ.

ᐅᖃᓚᐅᖅᐳᖅ ᐃᓗᐊᖅᓴᐃᔨᖏᑦ ᐅᖃᐅᔾᔨᓚᐅᖅᐳᑦ ᐃᓚᒌᖑᔪᓂ ᑐᓂᔭᐅᖁᔭᐅᓪᓗᓂ ᓂᐊᖁᖅᓯᐅᑎᓂ ᐋᑦᕕᐅᓪᒥ ᐊᒻᒪ ᑕᐃᓕᓈᓪᒥ ᐊᒻᒪ ᓈᒻᒪᒃᑐᒥ ᖃᐅᔨᓴᖅᑕᐅᑦᑎᐊᓚᐅᙱᓚᖅ ᐃᓱᒪᒋᓇᒍ ᐃᓱᒫᓘᑎᒋᔭᐅᔪᓂ.

ᓄᓇᑦᓯᐊᖅ ᑐᓴᒐᒃᓴᓕᕆᔨᒃᑯᑦ ᖃᔅᓯᒐᓚᒃᑎᒍᑦ ᖃᐅᔨᒋᐊᕋᓱᓚᐅᖅᐳᑦ ᐃᓚᒋᔭᐅᔪᓂ ᑭᓯᐊᓂ ᐱᓚᐅᙱᓚᑦ ᑭᐅᔭᐅᓂᐅᔪᒥ.

ᓄᓇᕕᖕᒥ ᐸᓖᓯᒃᑯᑦ ᐱᔨᑦᑎᕋᖅᑏᑦ ᓇᓗᓇᐃᖅᓯᓚᐅᖅᐳᑦ ᖃᕋᓴᐅᔭᑎᒍᑦ ᑎᑎᕋᕐᓂᐅᔪᒃᑯᑦ ᓄᓇᑦᓯᐊᖅ ᑐᓴᒐᒃᓴᓕᕆᔨᕐᖁᓐᓄᑦ ᐸᓖᓰᑦ ᑭᐅᓚᐅᕐᓂᖏᓐᓂ ᐋᒍᔅᑎ 1−ᒥ ᐃᓅᓕᓴᖅᑕᐅᓂᕐᒧᑦ ᐃᑲᔪᖅᑕᐅᔪᒪᓂᐅᔪᒧᑦ ᐅᖃᓗᖕᓂᐅᔪᒥ ᐱᔾᔪᑎᓕᖕᒥ ᖃᐅᔨᒪᙱᑦᑐᒥ ᑎᓴᒪᓂ-ᐅᑭᐅᓕᖕᒧᑦ ᐊᖏᕐᕋᕆᔭᐅᔪᒥ ᐃᕗᔾᔨᕕᖕᒥ.

ᑐᐊᕕᕐᓇᖅᑐᒥ ᐃᓅᓕᓴᐃᓂᕐᒧᑦ ᐱᔨᑦᑎᕋᖅᑎᒃᑯᓐᓂ ᐃᖅᑲᓇᐃᔭᖅᑎᓂ ᐅᓯᑲᑦᑕᓚᐅᖅᐳᑦ ᓱᕈᓯᕐᒥ ᐃᓅᓕᑦᓯᕕᒃ ᐋᓐᓂᐊᕕᒃ ᐸᓖᓯᒃᑯᑦ ᑭᐅᖕᒪᑕ, ᐊᖓᔪᖅᑳᑉ ᑐᖓᓕᐊ ᓵᓐ ᓛᖕᓯᑐᕇᑦ ᐅᖃᓚᐅᖅᐳᖅ.

ᐅᖃᐅᓯᐅᓪᓗᓂ ᐃᓅᓕᑦᓯᕕᒃ ᐋᓐᓂᐊᕕᒃ ᐃᑭᐊᖅᑭᕕᖓᓂ, ᐃᕗᔾᔨᕕᒃ ᐊᑕᐅᓯᕐᒥ ᐊᖓᔪᖅᑳᖑᔪᒥ ᐃᓗᐊᖅᓴᐃᔨᖃᖅᐳᖅ ᐊᒻᒪ ᐊᑕᐅᓯᕐᒥ ᐋᓐᓂᐊᕕᖕᒥ ᐃᓗᐊᖅᓴᐃᔨᖃᖅᐳᑦ ᑕᐃᑲᓂ.

ᑭᖑᓂᐊᒍᑦ ᑎᑎᕋᕐᓂᐅᔪᒥ ᐋᒍᔅᑎ 9−ᒥ, ᒪᖏᐅᖅ ᐅᖃᓚᐅᖅᐳᖅ ᔫᓯ ᑐᖁᓚᐅᕐᓂᖓᓂ ᐊᒻᒪ ᐸᓯᒃᖠᖅᖢᓂ ᐃᓗᐊᖅᓴᐃᔩᑦ ᐃᕗᔾᔨᕕᖕᒥ ᐊᒻᒪ ᐳᕕᖕᓂᖅᑑᒥ ᐅᒃᐱᕈᓱᓚᐅᙱᓐᓂᖏᓐᓂ ᐱᕐᔪᐊᖑᓂᖓᓂ ᐋᓐᓂᐊᕐᓂᖓᓂ.

ᑕᐃᒃᑯᐊ ᐃᓱᒫᓘᑕᐅᔪᑦ ᑎᑭᐅᑎᓚᐅᖅᐳᖅ ᐅᓄᕐᓂᖅᓴᓄᑦ ᐅᖃᓕᒫᖅᑎᓄᑦ ᑲᑕᔾᔭᖅᑎ ᓰᓇ ᓄᕗᓕᙵ ᐅᖃᐅᓯᖃᕐᒪᑦ ᑎᑎᕋᖅᑕᖓᓂ ᐳᓪᓚᔮᑦ ᑐᖁᓂᖓᓂ, ᐃᓚᖃᖅᑐᒥ GoFundMe ᑮᓇᐅᔭᓂ ᐱᕈᖅᓴᐃᓇᓱᐊᕐᓂᖓᓂ ᐃᓚᖏᓐᓄᑦ.

ᐃᓅᖃᑎᒌᖕᓄᑦ ᓯᐊᒻᒪᖅᑎᑦᑎᓂᕐᒧᑦ ᑎᑎᕋᖅᑕᖓ ᐱᒋᐊᖅᑎᑦᑎᓚᐅᖅᐳᖅ ᐅᖓᓯᒃᑐᒥᙶᖅᑐᓂ ᐃᒃᐱᒍᓱᖕᓂᐅᔪᒥ ᕿᒃᓵᖕᓇᖅᑐᒃᑰᖅᑎᓪᓗᒋᑦ ᐊᒻᒪ ᓄᑖᙳᕆᐊᖅᑐᒥ ᐅᖃᓪᓚᖕᓂᐅᔪᒥ ᐊᑐᐃᓐᓇᖃᕐᓂᕐᒥ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐸᖅᑭᔭᐅᓂᐅᔪᒥ ᓄᓇᖃᖅᑳᖅᓯᒪᔪᓄᑦ ᓄᓇᓕᐅᔪᓄᑦ.

ᒐᕙᒪᑐᖃᒃᑯᑦ ᓄᓇᖃᖅᑳᖅᓯᒪᔪᓄᑦ ᐱᔨᑦᑎᕋᕐᓂᕐᒧᑦ ᒥᓂᔅᑕᖓ ᒫᓐᑎ ᒑᓪ− ᒫᔅᑎ, ᓕᐳᕈᒃᑯᑦ ᑲᓇᑕᐅᑉ ᒪᓕᒐᓕᐅᖅᑎᖏᓐᓂ ᐃᓚᒋᔭᐅᔪᖅ ᐊᐱᑎᐱ—ᓯᕿᓂᕐᒥᐅᑦ—ᓄᓇᕕᒃ—ᐄᔭᐅ, ᑐᓂᓯᓚᐅᖅᐳᑦ ᐃᒃᐱᒍᓱᖕᓂᐅᔪᒥ ᕿᒃᓵᖕᓇᖅᑐᒃᑰᖅᑎᓪᓗᒋᑦ ᐋᒍᔅᑎ 12−ᒥ ᐳᓪᓚᔮᑦ ᐃᓚᖏᓐᓄᑦ ᐅᖃᐅᓯᒃᓴᓕᐅᕐᓂᒃᑯᑦ ᕙᐃᔅᐳᒃᑯᑦ.

“ᐆᒻᒪᑎᒃᑯᑦ ᐋᓐᓂᕐᓇᓚᐅᖅᐳᖅ ᑐᓴᕐᓂᕐᒥ ᐃᓅᔪᓐᓃᕐᓂᖓᓂ ᑎᓴᒪᓂ−ᐅᑭᐅᓕᖕᒥ ᓄᑲᑉᐱᐊᕐᒥ ᐃᕗᔾᔨᕕᖕᒥ, ᓂᕈᐊᖅᑕᐅᕝᕕᒋᔭᓐᓂ,” ᒑᓪ-ᒫᔅᑎ ᐅᖃᓚᐅᖅᐳᖅ.

“ᓂᕆᐅᒃᐳᒍᑦ ᑲᓇᑕᒥ ᐊᕕᒃᑐᖅᓯᒪᓂᐅᔪᒥ ᑯᐸᐃᖕᒥ ᐊᒻᒪ ᐃᓅᓕᓴᐃᓂᕐᒥ ᐃᖅᑲᓇᐃᔭᖅᑎᓂ ᐃᓚᐅᔪᓂ ᑭᐅᓂᖓᓂ ᐆᒥᖓ ᐱᓕᕆᓂᐅᔪᒥ ᐱᓪᓚᕆᐅᓂᖅᐹᖑᔪᒥ ᐊᒻᒪᓗ ᓇᓗᓇᐃᖅᓯᓂᕐᒥ ᐱᓕᕆᔾᔪᓯᐅᔪᖅ ᑐᓂᓯᔪᓐᓇᕐᓂᐊᕐᓂᖓᓂ ᑭᐅᔾᔪᑎᓂ ᐃᓚᖏᓐᓄᑦ ᐊᒻᒪ ᓄᓇᓕᖕᓄᑦ ᐱᓕᕆᓗᑎᒡᓗ ᐱᑎᑦᑎᑦᑕᐃᓕᒪᓂᕐᒧᑦ ᓯᕗᓂᒃᓴᒥ ᐱᓂᕐᓗᒡᔪᐊᕐᓂᐅᔪᓂ ᑕᐃᒪᐃᒃᑲᓐᓂᕐᓂᖓᓂ.”

ᐃᓅᓕᑦᓯᕕᒃ ᐋᓐᓂᐊᕕᒃ ᐊᒻᒪ ᓄᓇᕕᖕᒥ ᐊᕕᒃᑐᖅᓯᒪᓂᐅᔪᒥ ᑲᑎᒪᔨᓄᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂ ᐊᒻᒪ ᐃᓄᓕᕆᔨᒃᑯᓐᓂ ᑐᓂᓯᓚᐅᖅᐳᑦ ᑲᑐᔾᔨᓪᓗᑎᒃ ᐅᖃᐅᓯᒃᓴᓕᐊᖑᔪᒥ ᐋᒍᔅᑎ 12−ᒥ, ᐅᖃᐅᓯᖃᖅᖢᑎᒃ ᖃᔅᓯᒐᓚᖕᓂ ᕿᒥᕐᕈᔭᐅᓂᐅᔪᓂ ᐱᒋᐊᖅᑎᑕᐅᓯᒪᕗᑦ ᖃᓄᐃᓐᓂᐅᔪᓂ ᓱᕈᓯᐅᑉ ᑐᖁᓂᖓᓄᑦ.

ᐋᓐᓂᐊᕕᐅᑉ ᐃᓅᓕᓴᕐᕕᖕᒥ ᑐᑭᒧᐊᒃᑎᑦᑎᔨᖏᑦ ᐱᒋᐊᖅᓯᒪᕗᑦ ᐊᔾᔨᒌᙱᑦᑐᓂᒃ ᐱᓕᕆᐊᖃᕐᓂᕐᒥ ᕿᒥᕐᕈᔭᐅᓂᖓᓂ. ᑐᖁᖓᔪᓕᕆᔨ ᐱᒋᐊᖅᑎᑦᑎᓯᒪᑎᓪᓗᒍ ᖃᐅᔨᓴᖅᑕᐅᓂᐅᔪᒥ, ᐅᖃᐅᓯᒃᓴᓕᐊᖅ ᐅᖃᖅᓯᒪᕗᖅ.

ᑐᖁᖓᔪᓕᕆᔨᐅᑉ ᖃᐅᔨᓴᖅᑕᐅᓂᖓ, ᐱᓕᕆᐊᖑᓲᖑᔪᒥ ᑐᖁᔪᖃᕌᖓᑦ ᐅᕘᓇ ᐋᓐᓂᖅᓯᕆᕐᔪᐊᕐᓂᐅᔪᒥ, ᑐᑭᓯᓇᙱᑦᑐᒥ ᐅᕝᕙᓘᓐᓃᑦ ᑲᒪᑦᑎᐊᙱᑦᑐᒥ ᖃᓄᐃᓐᓂᐅᔪᓂ, ᐱᓕᕆᐊᖑᓲᖑᕗᖅ ᑕᖅᑭᓂᑦ 6−ᓂ 12−ᓄᑦ, ᐅᖃᓚᐅᖅᐳᖅ ᑯᐸᐃᖕᒥ ᑐᖁᖓᔪᓕᕆᔨᒧᑦ ᑎᑎᕋᕐᕕᖓᓂ ᐅᖃᖅᑎᐅᔪᒥ ᔭᐃᒃ ᓚᒧᑕ ᒍᕋᓈᑐ ᖃᕋᓴᐅᔭᑎᒍᑦ ᑎᑎᕋᕐᓂᐅᔪᒥ.

ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐊᒻᒪ ᐃᓄᓕᕆᔨᒃᑯᑦ ᑲᑎᒪᔨᖏᑕ ᐱᔨᑦᑎᕋᕐᓂᕐᒧᑦ ᐱᐅᓂᖓᓂ ᐊᒻᒪ ᐅᖃᐱᓘᑕᐅᔪᓂ ᑲᒥᓴᓇᖓ ᐃᓚᐅᖃᑕᐅᒋᕗᖅ, ᐊᒻᒪ ᐃᒻᒥᒃᑰᖅᑐᒥ ᐃᓅᓕᓴᐃᓂᕐᒧᑦ ᖃᐅᔨᓴᖅᑎᐅᔪᒥ ᓯᓚᑖᓂ ᐃᓅᓕᑦᓯᕕᒃ ᐋᓐᓂᐊᕕᖓᓂ ᕿᒥᕐᕈᓂᐊᖅᐳᑦ ᖃᓄᐃᓐᓂᐅᔪᒥ.

Québec solidaire, ᑲᓇᑕᐅᑉ ᐊᕕᒃᑐᖅᓯᒪᓂᖓᓂ ᑲᑎᒪᔨᕐᔪᐊᓄᑦ ᐃᓱᒪᒋᔭᐅᓂᐅᔪᓂ ᑲᑎᒪᔨᕐᔪᐊᖑᔪᓂ, ᖃᐃᖁᔨᓂᖃᖅᐳᖅ ᑯᐸᐃᖕᒥ ᓱᕈᓯᓄᑦ ᐱᔪᓐᓇᕐᓂᕆᔭᖏᓐᓂ ᐊᒻᒪ ᖃᓄᐃᙱᑦᑎᐊᕐᓂᐅᔪᒥ ᑲᒥᓴᓇᖓᓂ ᖃᐅᔨᓴᕐᓂᖓᓂ ᒨᓯᐅᑉ ᑐᖁᓂᖓᓂ.

“ᐅᓇ, ᓱᓕᒃᑲᓐᓂᖅ, ᐱᓕᕆᓂᐅᒍᓂ ᐱᓕᕆᔾᔪᓯᒥᒃ ᖃᓄᐃᑦᑑᓂᖏᑦ ᐱᔾᔪᑎᒋᓪᓗᒋᑦ ᐊᑭᕋᖅᑐᐃᓂᐅᒍᓂ ᐋᓐᓂᐊᖃᕐᓇᙱᑦᑐᓕᕆᓂᕐᒥ−ᐸᖅᑭᓂᐅᔪᒥ ᐱᓕᕆᔾᔪᓯᐅᔪᒥ, ᑐᑭᓯᓇᑦᑎᐊᖅᑐᒥ ᓇᓗᓇᐃᖅᑕᐅᔭᕆᐊᖃᖅᐳᖅ ᐊᒻᒪ ᒪᓕᒃᑐᒥ ᖃᓄᐃᓕᐅᕐᓂᐅᔪᒥ ᐱᓕᕆᐊᖑᔪᒥ,” ᑲᑎᒪᔨᕐᔪᐊᑦ ᐅᖃᖅᑎᖓ ᓲᓪ ᓴᓇᑎ ᐅᖃᓚᐅᖅᐳᖅ ᐋᒍᔅᑎ 13−ᒥ ᐅᐃᕖᑎᑐᑦ ᐅᖃᐅᓯᒃᓴᓕᐊᖑᔪᒥ.