Гонка ў свеце штучнага інтэлекту патрабуе ахвяр, і імі становяцца самі стваральнікі тэхналогій. За першыя месяцы 2026 года сусветныя IT-гіганты ўжо звольнілі больш за 100 тысяч супрацоўнікаў, агрэсіўна аптымізуючы выдаткі дзеля шматмільярдных інвестыцый у нейрасеткі.

Фота: LookByMedia

Пра трывожную тэндэнцыю ў тэхналагічным сектары піша партал Techspot, на што звярнуў увагу тэлеграм-канал «Bel-Geek.com». Паводле даных аналітычнага партала TrueUp, які адсочвае звальненні ў індустрыі, колькасць скарачэнняў з пачатку года перавысіла адзнаку ў 100 тысяч чалавек.

Статыстыка паказвае, што працэс набывае сістэмны характар: у кожным месяцы, за выключэннем красавіка, працу страчвалі больш за 20 тысяч спецыялістаў.

Найбуйнейшую хвалю скарачэнняў за апошні месяц узначаліла кампанія Meta, якая ўзяла курс на пераўтварэнне ў «AI-first company». Карпарацыя плануе звольніць каля 8 тысяч супрацоўнікаў, каб часткова кампенсаваць рост выдаткаў на штучны інтэлект, якія сёлета перавысяць 100 мільярдаў долараў.

Адначасова з гэтым яшчэ каля 7 тысяч працоўных месцаў могуць пераарыентаваць на ролі, звязаныя непасрэдна з AI. Іронія сітуацыі палягае ў тым, што навучаць свае сістэмы кампанія збіраецца, адсочваючы актыўнасць уласных супрацоўнікаў на працоўных месцах, што многія з іх ужо назвалі «неверагодна дэмаралізуючым».

Следам ідзе Cisco, якая нядаўна абвясціла пра звальненне 4 тысяч чалавек. Кіраўнік кампаніі Чак Робінс паспрабаваў падаць гэтую лічбу як аптымістычна нізкую, патлумачыўшы, што інвестыцыі ў інфраструктуру штучнага інтэлекту дазволяць не застацца за бортам глабальнага тэхналагічнага пераўзбраення.

Планы PayPal выглядаюць не менш амбіцыйна. Паводле інфармацыі The Wall Street Journal, кампанія імкнецца скараціць каля 20% свайго персаналу на працягу наступных двух-трох гадоў, што можа скласці амаль 4800 чалавек.

А вось кіраўніцтва кампаніі Intuit, скараціўшы 3 тысячы працоўных месцаў, або 17% свайго штату, паспрабавала захаваць твар, заявіўшы, што гэтыя звальненні нібыта «не звязаныя з AI», а з'яўляюцца часткай агульнай аптымізацыі.

Хоць менавіта інвестыцыі ў штучны інтэлект з'яўляюцца галоўным драйверам масавых звальненняў, інсайдары галіны адзначаюць і іншыя фактары. Сваю ролю адыгрываюць наступствы празмернага найму персаналу ў мінулыя гады і агульная перабудова бізнэс-мадэляў.

Асобным болем для рынку сталі праблемы ў індустрыі відэагульняў. Так, студыя Quantic Dream нядаўна звольніла каля 95 супрацоўнікаў пасля правалу свайго праекта Spellcaster Chronicles. Кампанія Bungie таксама плануе значныя скарачэнні, пацвердзіўшы, што чэрвеньскае абнаўленне для папулярнай гульні Destiny 2 стане апошнім, а распрацоўка трэцяй часткі пакуль нават не пачыналася.

Гісторыя тэхналагічнага прагрэсу заўсёды была гісторыяй аптымізацыі, але ніколі раней маштаб не быў такім глабальным, а тэрміны — такімі сціслымі. Штучны інтэлект, які павінен быў вызваліць чалавецтва ад руціны, пачаў з таго, што вызваляе яго ад працоўных месцаў.

Паводле прагнозаў аналітыкаў, у 2026 годзе колькасць звольненых у тэхналагічным сектары можа дасягнуць 370 тысяч чалавек, і гэтая хваля будзе толькі нарастаць. Галоўнае пытанне застаецца адкрытым: ці здольнае грамадства, якое так апантана імкнецца да тэхналагічнай сінгулярнасці, прапанаваць штосьці мільёнам людзей, якія апынуцца за бортам гэтай новай эканамічнай рэальнасці?

Усе навіны →