"Qırım ailesi" cemaat teşkilâtı Ukrayina medeniyet fondunıñ destegi ile Qırımımıznıñ kelecegi aqqında "EVİM/МІЙ ДІМ" adlı medeniyet leyhasını ömürge keçire.

Teşkilâtçılarnıñ sözlerine köre, teşebbüs "Qırımtatar medeniyetini saqlamaq ve populârlaştırmaq, Qırımnıñ medeniy mirası ile keniş auditoriyanı tanış etmek ve onıñnen zemaneviy munasebetler şekillerini yaratmaq" maqsadınen teşkil etildi. Esas diqqat Ukrayinadaki gençlerge ve çetelde yaşağan diasporağa ayırıla.

Leyha bir qaç yönelişni qaplap ala. Olarnıñ arasında Ukrayin, Qırımtatar ve İngliz tillerinde yarımadanıñ diqqatqa lâyıq yerleri aqqında 30 ikâye ile interaktiv multimediya audio reberi, ananeviy yemekler aqqında kulinariya video leyhası ve "Zemaneviy Qırımnıñ sesi nasıl" adlı muzıka sırası bar, onıñ çerçivesinde zemaneviy tertipte özgün nağmeler ile üç video klip yaratılacaq.

Bundan da ğayrı, leyha tasil merkezini köz ögünde tuta: çetelde ananeviy zenaatlar boyunca ustalıq dersleri ve Ukrayinada ve diasporada yaşlar içün yaş nesilniñ Qırımnen bağını saqlap qalmaq, milliy kimlikniñ saqlanmasına yardım etmek ve assimilâtsiyağa qarşılıq köstermek maqsadınen sekiz seminar keçirilecek.

Yekün tedbiri Qırım yarımadasınıñ işğalden qurtarıluvı ve onıñ medeniy zenginliginiñ saqlanuvı aqqında halqara munaqaşa olacaq.