– Fyrst høyrde me lyden lenge før dei kom inn i målesona mi. Då skjønte eg at det var snakk om stor hastigheit. Det viste seg jo at det var det.

Det seier Mons Klausen.

Han er avsnittsleiar i Utrykkingspolitiet (UP) i Nord-Noreg.

Onsdag kveld hadde UP fartskontroll på ei rett strekning mellom Svolvær og Leknes langs E10.

Asfalten var tørr, og sola titta fram bak skydekket. Rundt svingen kom to motorsyklar.

Den fyrste vart målt til 161 kilometer i timen i 80-sona.

Farta får Klausen til å reagere kraftig.

– Det er jo ikkje greitt. Det seier seg sjølv at når du doblar hastigheita i forhold til fartsgrensa på staden, så er det ikkje bra i det heile tatt.

Sommartrafikken i Lofoten har enno ikkje gitt seg. Det er framleis mykje trafikk og mange bubilar på vegane, ifølgje UP.

– Me må berre ta omsyn til kvarandre når me er ute og køyrer langs vegen, seier Klausen.

Politiet tok førarkortet frå føraren som vart målt, og vedkommande vart meld. Føraren er også avhøyrd.

Klausen opplyser at begge motorsyklane vart stansa, men at politiet berre fekk målt den fyrste.

– I dette tilfellet har me ei måling på den fyrste sykkelen som ein ser på biletet. Det er den eine saka me har. Me stansa sjølvsagt begge, også han som kom som nummer to.

Saka er enno ikkje avgjord. Riksadvokaten sine retningslinjer har fengsel som utgangspunkt frå 136 kilometer i timen i ei 80-sone.

UP delte eit bilete av fartsmålinga på Snapchat kort tid etter kontrollen.

Klausen håpar biletet kan ha ein førebyggjande effekt.

– Andre ser at det å bli tatt i slike hastigheiter får ein del konsekvensar. Eg synest det er veldig fint og førebyggjande at ein går ut med dette tidleg.

Han meiner skadepotensialet er enormt dersom noko går gale i slike hastigheiter.

I nærleiken av kontrollen fann politiet ferske elgspor.

– Me har sett elg i det området ved fleire høve. Det er vel kanskje tilfeldig at det går bra. Me har hatt fleire stygge MC-ulukker i Noreg så langt i år. Så det at ein vel å køyre i den hastigheita, synest me ikkje noko særleg om.

Åtte personar omkom på motorsykkel i juli. Det er det høgaste talet på omkomne på moped og motorsykkel i ein julimånad sidan 2010, skriv Statens vegvesen i ei pressemelding.

Ved utgangen av juli hadde totalt 16 personar omkome på motorsykkel i år. Halvparten av dødsfalla skjedde dermed i juli.

Det samla talet for dei fyrste sju månadene er det same som på tilsvarande tidspunkt i fjor.

– Over flere år har vi sett at MC-ulykker er en av de ulykkestypene vi ikke lykkes å skape reduksjon i. Som motorsyklist er du veldig ubeskyttet og sårbar om ulykken først er ute, seier fungerande avdelingsdirektør Hilde Therese Halås i Statens vegvesen i pressemeldinga.

Dei fem siste heile åra har 101 førarar og passasjerar på motorsykkel omkome i trafikken. I den same perioden vart 661 hardt skadde, viser tal frå Statistisk sentralbyrå.

Berre i 2025 omkom 25 personar på motorsykkel, medan 133 vart hardt skadde.

Kari Vassbotn, distriktsleiar i Trygg Trafikk, reagerer også på køyringa.

Ho peikar på at verneutstyr har avgrensa effekt dersom ein motorsyklist treffer asfalten i svært høg fart.

– Det synest eg faktisk er forferdeleg respektlaust overfor andre i trafikken og overfor sitt eige liv. Ein vel å ta nokre risikoar som er heilt unødvendige, og som set både sitt eige og andre sitt liv i fare.

Vassbotn meiner dei som vil teste fart og grenser, må gjere det andre stader enn på offentleg veg.

– Sjølv om fart og spenning er artig, så er det ikkje det du skal drive på med på vegen. Då får du heller dra på tivoli.

Ho meiner politikontrollar er eit viktig verkemiddel for å få trafikantane til å halde fartsgrensa.

– All forsking tilseier at faren for å bli oppdaga er eitt av dei beste verkemidla vi har for at farten blir halden nede.