Ekspertar meiner straumen vil verte spesielt dyr i haust og ut vinteren.

Ikkje sidan 2018, eit unormalt tørt og varmt år, har so lite straum frå vasskraft blitt produsert i juli månad, syner nye tal frå SSB.

Samstundes har importen av straum ikkje vore so høg den same månaden sidan 2004.

I mange delar av landet er det unormalt lite vatn i vassmagasina.

Nokre stadar er det over 20 år sidan det sist var so lite i lageret til kraftprodusentane.

– Det betyr jo at prisen vil halde seg mykje høgare enn det som er normalt for årstida, seier kraftanalytikar Olav Botnen i Volt Power Analytics.

Christian Solevågseide, direktør for vasskraft i Tafjord Kraft, seier den snøfattige vinteren og regnfattige første halvåret har strupa produksjonen av straum.

– Som dei fleste har sett so er prisane litt høgare enn dei normalt plar vere på sommaren, seier Solevågseide.

Og slik vil det bli ut året, trur ekspertane.

I takt med at produksjonen har bremsa opp, har importen av straum auka. Ikkje sidan 2004 har Noreg importert so mykje straum frå utlandet ein juli månad:

– Det er jo eit veldig bra bilete på at kraftmarknaden faktisk fungerer, trass i at mange hevdar noko anna. Det er jo akkurat slik det er meint å fungere, seier Lars Magnus Günther, pressetalsperson i Statkraft.

Men større import vil bety ein meir «europeisk» straumpris enn ein er vand med i Noreg, ifølgje kraftanalytikar Botnen.

– Det betyr at ein må liggje nærare dei tyske og kontinentale prisane framover, for Sør-Noreg sin del.

Han seier at underskottet på vatn i magasina ikkje vil rette seg med nokre regnfulle haustveker, og at ein må halde fram med å importere meir straum enn vanleg ut året.

– Men ikkje mykje, for ein hadde ein buffer i utgangspunktet. I normalår har Sør-Noreg eit ganske stort kraftoverskott, men vassunderskottet no er endå større, seier Botnen.

Sjølv om produksjonen er låg i Sør-Noreg, gjeld det ikkje alle.

I Midt-Noreg får ein straum frå Nord-Noreg og Sverige, som har meir tilgjengeleg vatn ifølgje Botnen.

– Det er heilt annleis i Nord-Noreg. Der er det veldig vått enno, so ein vil få tilført ein del kraft derifrå til NO3.