– Norgespris vil løne seg med god margin frå Trøndelag og sørover, seier fagansvarleg Thomas Iversen.

– Noregspris er ein gåvepakke som gjer at ein gjennomsnittshushaldning vil spare ca. 3000 kroner i haust, seier Tor Reier Lilleholt.

• Anders Lie Brenna, Redaktør / EnergiWatch.no

  Med unntak av NO4 bør alle hushald teikne norgespris. Det norske straumsystemet er vêravhengig, men sjansen for at straumprisen blir mykje høgare enn norgespris er langt større enn at han blir lågare. Nedsida ved å velje norgespris er dermed mykje mindre enn ved å la vere. Det blir også spennande å sjå kva regjeringa gjer med prisnivået i framlegget til statsbudsjett i oktober.

• Kristina Lysen, Divisjonsleiar i Eviny Fornybar AS

  Det er stor usikkerheit rundt prisprognosar framover. Låge magasin i sør og høge gassprisar i Europa trekkjer prisane opp, men vêret i haust avgjer alt. Vestlandet opplevde nyleg årets våtaste døgn, og meir regn vil betre fyllinga. Likevel veks etterspurnaden etter kraft raskare enn utbygginga. Den langsiktige løysinga på høge straumprisar er å byggje ut meir kraft, nett og effekt raskare.

• Ole‑Johnny Nesdal, Porteføljeforvaltar i SFE

  Låge magasin minskar prisdifferansen mot Europa, der geopolitisk uro og ein eventuell kald vinter kan presse prisane opp. Ein våt haust i Norden og ein mild europeisk vinter vil derimot halde prisane nede. Det er vanskeleg å modellere ei eksakt prisforventning for hausten og vinteren, men folk bør ta inn over seg at utfallsrommet for korleis prisane vil utvikle seg er svært stort.

• Catchlight / NVE / Kristian Løksa

  Kjetil Lund, NVE-direktør

  I ein situasjon med lågare magasinfylling enn normalt og stor internasjonall usikkerheit, må vi rekne med høge kraftprisar gjennom hausten og vinteren. Prisane avheng av nedbør, forbruk, gassprisar og kraftsituasjonen i nabolanda våre. Forsyningstryggleik og prisar heng saman: Når produsentane held tilbake vatn, går produksjonen ned og prisane normalt opp.

• Lars Tennbakk Bockman, Fornybar Norge

  Kraftprisen framover er svært usikker og avheng av vêret og situasjonen i Iran. I tørre år blir vi avhengige av import, noko som gir høge prisar. 2026 har vore tørt, og krigen i Iran har driven gassprisen til det høgaste nivået sidan energikrisa. Forsyninga er ikkje i fare, men prisane kan bli høge i vinter. Vi tilrår derfor alle i Sør- og Midt-Noreg å teikne Norgespris.

• Ivar Refsdal, konsulent i THEMA

  Gjennom sommaren har prisen i sør ligge rundt 100 øre/kWh, og vi forventar at prisen skal opp når det blir kaldare og mindre tilgang på billeg tysk solkraft. Sjølv om hausten blir mild og våt, vil prisnivået liggje høgare enn dei siste åra. For Midt-Noreg burde man teikne Norgespris, då prisane her òg ventast å liggje godt over Norgespris-nivået.

• Asgeir Tomasgard, professor ved NTNU

  Det er lite i dagens situasjon som tilseier låge straumprisar i Sør-Noreg. Høge gassprisar påverkar straumprisen i Europa og dermed òg i Noreg, og situasjonen i Midtausten vil føre til framleis høge gassprisar. Vasskrafta kan jamne ut effektane, men med låg fyllingsgrad blir denne evna mindre. Eg er ikkje begeistra for utforminga av Norgespris, men har teikna det på hytta og vurderer det heime.

• Thomas Iversen, fagansvarleg i Forbrukarrådet

  Dei fleste analysar tilseier at straumprisane blir høge framover, og at Norgespris vil løne seg med god margin frå Trøndelag og sørover. For å gjere det enkelt å sjekke om avtalen løner seg, har vi lyst ut ein kalkulator der du kan leggje inn forbruket ditt eller storleiken på bustaden. Her er det truleg mykje å spare for mange som ikkje har teikna avtalen enno.

• Marius Holm Rennesund, partnar i THEMA

  Dersom den tørre vêrtypen fortset, vil vi først ønske å avgrense eksporten til kontinentet så mykje som mogleg, før det kan bli behov for import utover vinteren. Tyske haustkontraktar prisast opp mot 140–150 øre/kWh, og dette er nivåa vi må nærme oss i Sør-Noreg for å avgrense eksporten. Med låg magasinfylling òg i Midt-Noreg er det svært fornuftig for kundar der å teikne Norgespris.

• Tor Reier Lilleholt, kraftanalytikar

  Til folk i Midt-Noreg kan eg trygt seie at det ikkje er nokon som prøver å lure dykk, men ein gåvepakke frå staten for å hjelpe til å redusere straumrekninga. Med dei forventningane ein ser no vil ein gjennomsnittshushaldning spare ca. 3000 kroner i haust. Det bør ingen takke nei til. Alternativ straumstøtte slår ikkje inn før prisen er over 80 øre, så dette gjev vesentleg meir støtte.

• Odin Foldvik Eikeland, senioranalytikar i Rystad Energy

  Fyllingsgraden i Sørvest-Noreg er veldig låg no, så vi må håpe på ein haust med mykje nedbør. Min helsing til norske straumkundar er at folk i Midt-Noreg bør teikne kontrakt på Norgespris. Prisen ligg langt lågare enn venta spotprisar og gjev tryggleik. Blir det ein tørr haust og ein eskalering i Midtausten, kan prisane stige ytterlegare. Det er større oppside- enn nedsidepotensial.

• Åsmund Sunde Valseth, Vista analyse

  Dyr kveldsstraum gjer at vi kunne spart pengar på å lade elbilen når færre bruker straum. Med Norgespris har hushaldningane likevel lite å tene på å flytte forbruket. Hadde støtta i staden vore uavhengig av forbruket, ville nok fleire tilpassa seg. Då ville energiressursane vore betre utnytta, og samfunnet vore betre rusta for høge straumprisar utover hausten og vinteren.